Lugan ti kapitolio, naitaray

STO. DOMINGO, Ilocos Sur – Intaray ti maysa a lalaki ti service vehicle ti provincial capitol a pinanawan ti drayber nga agan-andar iti sango ti maysa a hardware store a masarakan iti igid ti national highway sadiay Barangay Vacunero ditoy nga ili idi bigat ti Disiembre 3.
Nagreport iti polis ni Saturnino Cañero y Albay, 58, naasawaan, residente iti Barangay Borobor, ditoy nga ili, nga intaray ti maysa a lalaki ti Hyundai Coaster a service vehicle ti provincial capitol nga imparkingna a nakaandar iti sango ti Agatep Lumber and Hardware sa napan gimmatang iti adaptor para iti electrical pump.

Nangiwayat ti polis-Sto. Domingo iti hot pursuit operation idinto a pinakdaaranda dagiti kabangibangda a police station mainaig iti naitaray a lugan.

Nangiwayat met ti Bantay police iti dragnet ket pinasardengda ti lugan sada inaresto ti suspek a nabigbig a maysa a Darwin Aquino y Castillo, 24, baro, ken residente iti Poblacion West, San Ildefonso, .

Impaima dagiti polis-Bantay ni Aquino kadagiti nagresponde a polis ti Sto. Domingo.#