Lugan ti polis, BFP member nagdinnungpar

SUYO, Ilocos Sur – Nagdinnungpar ti lugan ti maysa a polis ken kameng ti Bureau of Fire Protection iti national highway a sakup ti Barangay Man-atong, Suyo, ditoy nga ili idi malem ti Septiembre 15.

Idi agarup 12:15 ti malem ti nadakamat a petsa, napasamak iti nagkurbaan a sakup ti Sitio Butac, daytoy a barangay ti panagdinnungpar ti Kia Troop Carrier a minaneho ni PO2 Jerald Doliente y Lumaban, 31, awanan asawa, naka-assigned iti Ilocos Sur Police Public Safety Company, 2nd Maneuver Company a nakabase iti Barangay Uso, Suyo, Ilocos Sur, ken ti Tamaraw FX a minaneho ni SFO3 Arsenio Palangdosan, 55, kameng ti Bureau of Fire Protection a naka-assigned iti Suyo, Ilocos Sur, .

Kas maibatay iti report, bayat ti panagpatroliada, agpalaud a direksion ti Kia Troop Carrier, kaduana ti sumagmamano a polis, ngem iti nadakamat a pagkurbaan, mapapati a kimmaut iti liniana ti kasabatna a FX Tamaraw a minaneho ni Palongdasan a nakaigapuan ti panagdinnungparda.

Nupay awan ti nadunor, naglak-am dagiti luganda iti pannakadadael.#