Lumba iti bisikleta naangay

SINAIT,  Ilocos Sur – Nasurok a limapulo a siklista manipud iti nadumaduma nga ili ti Ilocos Sur pakairamanan ti tallo a beterano iti national cycling competitions ti nakisalip iti individual time trial a format ti elimination round ti kaunaan a lumba ti Ilocos Sur idi Pebrero 23.

Nairugi ti 42-kilometro a lumba iti nagbedngan daytoy nga ili ken ti Badoc, Ilocos Norte ket nagpatingga iti sango ti kapitolio iti siudad ti Vigan. Inesponsoran ti League of Civil Societies of Ilocos Sur ken ti gobierno probinsial ti nasao a a pasalip.

Segun ken ni Bokal Jose Bunuan Jr., iti pannakaisayangkat ti nadakamat a torneo,  maitandudo ti turismo ta labsan dagiti siklista ti amin nga ili ti probinsia a mangatrakar iti adu a turista; maitandudo ti salun-at ken sports program; maguyugoy ti gobierno a mangpasimpa kadagiti kalsada iti upland municipalities tapno napintas a pakaangayan dagiti sumaruno a laps ti torneo; ken kangrunaanna, makadiskubre ti taga-Ilocos Sur a mabalin nga isali iti nasional ken internasional a lumba ti bisikleta.#