Lunod iti Barukong

Sarita ni Monique E. T. Recaido

NAGBANURBOR ti patrol car iti sanguanan ti presinto. Dimsaag ni Patrolman Anicoche. Adda kaduana nga agtutubo.

“Ania ti basolna, Fred?” inamadko.

“Jaywalking, littering ken panagpasukib, Chief,” insungbat ni Anicoche. “Makaammokan kenkuana. pards.”

Nagliadak iti tugawko. Minatmatak ti agtutubo. Napudaw. Adda pamuyaanna. Madlaw a nagtaud iti adda mabalinna a pamilia.

Roberto de Vega ti naganna. Agtawen iti sangapulo ket pito. Estudiante iti maysa a nalatak nga unibersidad iti siudad. Agnaed iti 15 Tacay Road, Quezon Hill. Bugbugtong nga anak ni Bernardo de Vega, nalatak a negosiante. Mabigbig met a social worker ni mamangna.

“Nadagsen a basol ti inaramidmo, barok,” kinunak.

“Ammok,” insungbatna, ket nakisinnalip dagiti matana.

“Apay ngarud a naglabsingka?” sinaludsodko idinto a nagliadak iti tugawko.

“Isut’ kayatko!” natangsit a sungbat ti agtutubo.

“Agar-aramatka iti drug?”

“Saanak nga addict,” inkusilapna. “Limpio ti panunotko.”

“No nasimbeng ti panunotmo, apay ngarud a linabsingmo ti linteg?”

“Kayatko ti mabalud!”

“Adda kadi kinaguram ‘diay balayyo, Roberto?”

Saan a simmungbat. Nagtupa ti sangina.

“Ibilangnak koma nga inauna a kabsatmo. Nakasaganaak a tumulong kenka.”

“Dinak matulongan.”

“Marisut ti ania man a parikut uray kasano ti kinarigatna. Dika bumdeng a mangibaga kaniak.”

Kinaem ni Roberto ti bibigna.

Inkur-itko iti police blotter ti basolna. Inayabak ni PO3 Lagasca ket imbilinko nga ipupokna.

Pinidutko ti auditibo ket immawagak iti adres nga imbaga ni Roberto. Lalaki ti simmungbat.

“Dakayo kadi ti ama ni Roberto De Vega?” inamadko.

“Siak ti hardineroda. sir. Adda kadi masapulyo iti amok?”

“Di la mabalin a kasaritak ti papang ni Roberto?”

“Awan ni Mr. De Vega. Adda komperensia a tinabunuanna.”

“Ni mamangna?”

“Nasapa a dinagas dagiti gagayyemna a mapan makimadiong. Rabiinton no sumangpet.”

Indissok ti auditibo kalpasan ti panangibagak a nakakulong ni Roberto. Imbagak ti numero ti presintomi.

Tinaldiapak ni Roberto. Nairteng ti rupana a nangmulengleng iti rehas ti pagbaludan.

ALAS siete ti sardam. Agsaraawen ti tianko. Imbilinko ken ni PO2 Roxas a sublatannak.

Sinabatnak ti asimbuyok idi rummuarak iti presinto. Dandani saan a makakunail dagiti lugan. Tumuyutoy dagiti estudiante iti bangketa. Panagaawiden.

Bimmallasiwak iti kalsada. Simrekak iti Janet’s Restaurant. Nagorderak iti pritada a baboy, sinigang a bangus ken innapuy.

Mangmanganak idi makangngegak iti ikkis iti ruar. Rimmuarak. Sinabatnak ni Misis Arde, ti akinkukua iti Mercury Refreshment Parlor.

“Sir, adda teen-ager nga agkibkibor iti puestok,” inyanangsabna. “Pagtalnaem koma.”

“Siak ti makaammo,” kinunak.

Naklaatak idi makastrekak iti pagpalamiisan. Naburang-it dagiti lamisaan ken tugaw. Nabuong dagiti sarming dagiti eskaparate ken naiburandis dagiti tagilako iti suelo.”

“Dayta ti nagkibor, sarhento!” intudo ni Misis Arde ti agtutubo a nakatugaw iti suli.

Inasitgak. Ni Roberto De Vega!

(Maituloyto)