Lunod ti Nakaparsuaan

Iti baet ti pannakaimplementar dagiti paglintegan mainaig iti nadalus nga aglawlaw ken pannakamanehar ti solido a rugit, nakaro ti polusion ken agtultuloy ti pannakadadael ti nakaparsuaan ditoy pagilian.

Segun iti resulta ti maysa a panagadal nga insayangkat ti maysa a grupo dagiti eksperto manipud kadagiti maraem nga unibersidad iti Estados Unidos babaen ti pannakikammayyet ti World Ecnomic Forum, maika-117 ti Filipinas kadagiti 142 a pagilian nga agsagsagaba iti nakaro a polusion.

Nupay idauluan ti pagilian dagiti makunkuna a “hot spots” wenno “nangato a tukad ti pannakaammo iti serioso a ballaag ti panagpukaw dagiti nabiag ken iti nakaugalian a panagdadael,” maysa ti Filipinas kadagiti kakaruan iti pannakarabngis ti aglawlawna.

Suportaran daytoy ti naduktalan iti maysa a panagadal nga 80 porsiento  kadagiti kadilian ti pagilian ti nadadaelen ken 90 porsiento iti orihinal a kabakiran ti nagpukawen.

Kasta met a nakaro ti pannakadadael ti biag iti kabaybayan agsipud iti maikaniwas ken illegal a panagkalap kas iti panagaramat it sabidong ken dinamita.

Mapattapatta a no saan malapdan ti pannakapukan dagiti kayo, kalbonton dagiti bantay iti pagilian iti tawen 2025.

Malaksid dagita, nakaro ti problema iti rugit ken basura iti pagilian nangnangruna kadagiti siudad ken dadakkel nga ili.

Iti Metro Manila laengen, nasurok a 6,000 tonelada ti maibasura iti inaldaw, segun ken ni Sen. Loren Legarda.

Wen, dakkel a parikut ti polusion ken basura a rumbeng nga ikkan dagiti opisialtayo iti naan-anay nga imatang.

Ngem ti yan ti problema ket dagiti umili met laeng. Adu dagiti umili ti awan disiplinada. Dadaelenda ti nakaparsuaan gapu laeng iti bukodda a pagimbagan.

Agingga iti saan a magutugot dagiti umili a tumulong a naimpusuan iti kampania ken naing-inget ti pannakaimplementar dagiti paglintegan, agtultuloy ti pannakadadael ti aglawlaw iti pagilian.

Agballigi laeng ti kampania ti gobierno babaen ti panagkikinnamayyet amin a sektor ditoy pagilian para iti pannakasaluad ti aglawlaw ken nakaparsuaan.

Ngem no ibasartayo iti kapaliiwan a kinasukir dagiti Filipino, adayo a mapasamak dayta.

Ngem iti agtultuloy a  pannakaabuso ti aglawlaw, tinto sumarsaruno a kaputotan ti pagdas-alan ti lunod ti nakaparsuaan!

Dayta kadi ti kayattayo a mapasamak?#