Luzon nagsagrap iti sapasap a blackout

Nagsagrap iti power blackout ti nadumaduma a lugar iti Luzon a pakaibilangan ti Metro Manila gapu iti kellaat a panagiddep dagiti lima a power plants iti Luzon grid idi nasapa a malem ti Mayo 8, lima nga aldaw sakbay ti panagbubutos.

Naammuan a nagpukaw ti koriente iti Ilocos Sur, Ilocos Norte, La Union ken Pangasinan nangrugi iti alas dos ti malem ti nadakamat nga aldaw a pakaibilangan ti Bulacan, Pampanga, Nueva Ecija, Bataan, Cavite, Laguna, agingga iti Bicol iti umabagatan.

Naireport pay a madama ti press briefing ni Presidential Spokesperson Abigail Valte iti Malakaniang idi naggawan ti koriente ket kapilitan a nagusar dagiti nadumaduma nga opisina ditoy iti generator iti aganay uppat nga oras.

Nangrugi ti panagawan ti koriente iti Metro Manila iti 1:50 ti malem ket nagsagrap met dagiti siudad ti Quezon, Parañaque, Pasig ken dadduma a lugar iti rotating brownouts.

Naisubli met la ti koriente iti Metro Manila iti alas 9:45 ti rabii, kas inreport ti Meralco.

Nasuspende pay ti operasion ti Light Rail Transist Lines 1 and 2 iti sumagmamano nga oras.

Segun iti National Grid Corporation of the Philippines (NGCP), generation deficiency kadagiti lima a power plants a mangsupsuplay iti elektrisidad iti Luzon grid ti nakagapu iti panagawan ti koriente.

Karaman kadagiti naapektaran a power plants ti Santa Rita Natural Gas (1,000 megawatt capacity), San Lorenzo Combined Cycle Gas (500 MW), Ilijan Natural Gas (1,200 MW), Quezon Power Coal (440 MW), ken Sual 1 Coal (1,000 MW).

Kinuna ni Lilibeth Gaydowen, communications officer ti NGCP, agdagup iti 3,700 megawatts ti nag-offline ket nupay adda 8,983 MW a system capacity iti Luzon  ken expected system peak a 8,256 MW wenno reserba a 727 MW, dagus a naibbus daytoy a nagresulta iti dakdakkel a panagkamtud iti kapasidad ti enerhia.

Kabayatanna, impasingked ti Malakaniang nga awanto ti power outages inton Mayo 13, aldaw ti panagbubutos.

Kinuna ni Valte a naipasigurado ken ni Presidente Benigno Aquino III nga adda umdas a power para iti aldaw ti panagbubutos ken maiwaywayat amin nga addang tapno masigurado ti suplay ti koriente iti sapasap a pagilian inton panagpipili.

Impasingked met ni Energy Secretary Jericho Petilla nga adda umdas a power supply inton aldaw ti panagbubutos.

Kinuna ni Petilla a no adda panaggawan ti koriente inton Mayo 13, saan a maapektaran dagiti precinct count optical scan (PCOS) machines agsipud ta addaanda iti emergency power supply.#