Naaprobaran iti session dagiti young public servants, mairaman nga ordinansa

CABUGAO, Ilocos Sur – Nailungalong a mairaman iti paglintegan ti ili dagiti ordinansa ken resolusion a naaprobaran iti session ti sangguniang bayan ditoy nga ili bayat ti panagtakem dagiti young public servants.

Ipapaay ti gobierno lokal nga idadauluan ni Mayor Edgardo S. Cobangbang, Jr. ti gundaway kadagiti ubbing a mangituray iti ili tunggal bulan ti Oktubre kas paset ti selebrasion ti Children’s Month.

Maited kadagiti young public servants ti maysa nga aldaw a mangannong iti posision dagiti agtuturay ti lokal a gobierno ditoy nga ili manipud iti mayor, bise mayor, dagiti konsehal ken dagiti dadaulo dagiti nadumaduma nga ahensia ti turay.

Karaman kadagiti aktibidad ti panangtratar dagiti ubbing dagiti resolusion ken ordinansa a naikalendario iti session babaen ti panangbayabay kadakuada ti kameng ti sangguniang bayan.

Babaen iti daytoy a lungalong, amin nga ordinansa ken resolusion a naaprobaran bayat ti session a panagturay dagiti young public servants ket karamanton ken agbalin a paset ti paglintegan ditoy nga ili.#