Footer

Maatap a kameng ti NPA, naaresto iti Baguio City

BAGUIO CITY – Maysa a maatap a kameng ti New People”s Army ti inaresto dagiti polis ditoy itay lawasna bayat ti mapapati a panagsipsiputna iti asideg ti maysa a police assistance center ditoy siudad.

Innaganan dagiti polis ti suspetsa a ni  Jumar Gumaro, 18,  mapapati a kameng ti Chadli Molintas Command nga agdakdakiwas iti Ilocos-Cordillera ken nabirngasan iti “Jackson Martinez” ken “Ka Jack”.

Segun iti report manipud iti police regional office iti Cordillera Administrative Region (CAR), nakita dagiti polis ni Gumaro a nakakaratay iti bukotna ti maysa a back pack iti agarup ala una ti bigat ti Lunes iti maysa a police assistance center iti Session Road ditoy siudad.

Mapapati nga immasideg ti suspetsa iti naka-duty a polis ket kiniddawna a palabsenna ti rabii  iti PAC ngem nagsuspetsa ti polis ket dinawatna ti identification card ni Gumaro. Retrato ketdi a kaduana ti maysa a babai ti impakita ti suspetsa.

Mapapati a maysa a papel ti natinnag manipud iti back pack ni Gumaro ket natakuatan dagiti polis a maysa a sertipiko ti panagturpos daytoy iti training manipud iti Chadli Molintas Command.

Gapu iti daytoy, rinikisa dagiti polis ti suspetsa ket nakakumpiskada iti dua a bala ti M16 rifle, maysa a bala ti M14 rifle ken notebook a mapapati a naglaon iti subersibo a dokumento.

Dinetene dagiti polis ni Gumaro para iti naing-inget nga inbestigasion.#