Maaw-awanen positibo nga ugali dagiti boy scouts – Scout Executive

CAOAYAN, Ilocos Sur – Madlaw la unay ti paggidiatan ti kababalin dagiti boy scouts idi no ikumpara ita, daytoy ti linagidaw ti dadaulo ti gunglo dagiti boy scouts ditoy pro-binsia.

Kinuna ni Dr. Gil Savellano, Council Executive ti Boy Scouts of the Philippines-Ilocos Sur Chapter, a maaw-awanen dagiti positibo nga ugali nga ikut dagiti boy scouts iti agdama ket dakkel ti pakaigidiatanda kada-giti kabaddungalanda iti napalabas.

Nasurok a 3,000 a boy scouts, senior scouts ken scout masters ti timmabuno iti Maika-30 a BSP Provincial Jamborette a naangay ditoy nga ili idi Disiembre 1-4.

Maysa a nakagapu daytoy a dillaw ni Savellano ti naob-serbana nga ipapanaw dagiti dadduma nga scout troops iti nakaangayan ti panglukat a programa nupay saan pay a nalpas ti panagpabuya dagiti dadduma a tropa ken saan pay a nalpas a nagsarita dagiti opisial ti probinsia ken BSP.

“Nakamadmadi a kitkitaen a kastoy ti napasamak ken na-kababain kadagiti sangaili. Panagkunak, masapul nga addaan iti inisiatibo dagiti scout masters a mangiturong ken mangiwanwan kadagiti scouts  nga aywanda a saan ketdi nga isuda ti mangiyuna iti ipapanaw iti venue,” kinuna ni Savellano idinto nga innayonna a “maysa dayta a nakalawlawag a saan a panangsurot iti Scout Oath a “To Make Good Turns Daily” ken Scout Laws.

Iti sabali a bangir, indepensa ni Savellano ti komento mainaig ti saan a panagpapada ti sapatos ken uniporme dagiti nakipartisipar, saan a kas iti naglabas a naistriktoda mainaig iti uniporme.

“Pudno a napinpintas koma a kitaen no kas iti dati ngem maawatantayo ti rigat ti biag, isu a linukayanmin ti regulasion mainaig iti uniporme. Ti nasken, adu ti agmiembro ken agga-rawda kas pudpudno nga scouts,” depensa ti opisial.

Malaksid ti panagkampo, karaman pay iti uppat nga aldaw a panagtitipon dagiti scouts ti panagsanayda iti first aid and rescue, panagmulada kadagiti kayo, panangipaayda iti com-munity service ken immersion.#