Maestro, binagsol ti kinadeytna

SANTIAGO, Ilocos Sur – Mapapati nga agkurang ti inted ti maestro a bayad ti ‘serbisio’ ti kinatulagna a kadeyt a nakaigapuan ti nangbagsolan ti suspek iti biktima.

Iti report a dimmanon iti police station ditoy, napasamak ti pammagsol sadiay Barangay Ambucao idi agarup 12:45 ti Mayo 18 no sadino a binagsol ni Ericson Gabor y Naungayan, 19, ni Marvin Gacutan y Molina, 29, maestro, gapu ta mapapati a saan a tinungpal ti biktima ti nagtulaganda a pagbayad daytoy kalpasan ti panagkanaigda.

Segun iti panagimbestiga dagiti polis, P500.00 ti nagtulagan dagiti dua nga ited ti maestro iti panagseksda.

Sakbayna, nagsarak dagiti dua iti Centrum Gasoline Station iti Candon City, sada napan iti Barangay Ambucao, Santiago a naglugan iti bukodda a motorsiklo.

Nagsubang da Gabor ken Gacutan idi P200.00 laeng ti inted ti maestro kalpasan ti mapapati a panagkainaigda a nagtungpal iti panangbagsol ti suspek iti biktima iti namin-uppat a daras.

Nupay kasta, nabaelan ti biktima a sinakayan ti motorsiklona sa nagpaarayat iti balay ti maysa nga Engineer Nestor Peralta iti Barangay Sabangan, Santiago, Ilocos Sur ken intaray dagiti nagresponde a polis iti Candon General Hospital.

Naaresto ni Gabor iti balayda idinto a narekobre dagiti inbestigador iti nakapasamakan ti krimen ti kutsilio nga inaramatna a pinangbagsol iti maestro.#