Footer

Maguey, baro nga OTOP ti Cervantes

CERVANTES, Ilocos Sur – Saanen a mangga no di ket maguey ti One Town One Product (OTOP) daytoy nga ili.

Kanaig daytoy, kinuna ni Mayor Benjamin Maggay a nairusat itay nabiit ti Maguey Production for Income Generation and Community/Indigenous People Empowerment for Sustainable Development a mangitantudo iti maguey kas baro nga OTOP ditoy.

Kinuna ni  Maggay a nasuktan ti mangga nga OTOP ti ilida agsipud ta seasonal laeng daytoy. Ti mangga ti immuna nga inrehistro ti Department of Trade and Industry kas OTOP daytoy nga ili.

“Adu ngamin ti mula a maguey iti amin a paset ti ili ken adu ti mabalin a pakaaramidan daytoy no maproseso. Apaman a rummuar iti decorticating machine, mabalinen a maaramid a tali, placemat, bag, wenno tsinelas,” kinuna ti mayor.

Inggannuat payen ni Maggay ti nasaknap a panagmula iti maguey tapno saan a maibusan dagiti agprosproseso.

Kinuna dagiti kameng ti Cervantes, Ilocos Sur Development Center Inc. a kangrunaan a parikutda ti agdama ti paglakuanda iti produktoda manipud iti maguey ken no kasano a mapapintasda dagiti aramidda.

Kas suportana iti nasao a programa, impasigurado ti Department of Trade and Industry ti panangitedna iti P80,000 para iti puonan ken training dagiti kameng ti CISDCI.

Nangikari met ni Gov. Deogracias Victor Savellano iti P50,000 para iti grupo.

Idi Mayo, karaman ti grupo kadagiti inikkan ti Philippine-Australian Assistance Program Panibagong Paraan iti P1 million a puonan. Kabingayda ditoy ti dadduma pay nga assosasion iti sabsabali pay a paset ti pagilian.#