Maibiahe a maiparparit a droga, naapput iti dragnet operation

SUDIPEN, La Union – Nakaeskor manen ti kapolisan iti kampaniana maikontra iti maiparparit a droga iti pannakatiliw ti maysa a lalaki sadiay Barangay Poblacion ditoy nga ili bayat ti panangibiahena iti marijuana bricks idi bigat ti Enero 23.

Inapput dagiti nagtitipon nga elemento ti kapolisan a pakaibilangan ti La Union Provincial Police Office, Ilocos Sur Provincial Police Office, Benguet Provincial Police Office, Alilem Police Station, Bakun Police Station, ken Sudipen Police Station ni Rufino Sagada y Bantiao, 19, residente iti Barangay Kayapa, Bakun, Benguet, apaman a nakadissaag iti nagluganna iti terminal ti van sadiay Barangay Poblacion ditoy nga ili idi agarup 9:25 ti bigat ti nadakamat a petsa.

Nakakumpiska dagiti polis iti ikut ni Sagada iti pito a bricks ken innem nga elongated bundles ti napagango a marijuana fruiting tops nga agdagsen iti sumurok kumurang 13 kilos.

Iti panangimbentario dagiti polis, 5 iti pito a bricks ti napagango a marihuana ti nabungon iti puraw a selopin, 2 ti nabungon iti nalabaga ken berde a selopin idinto a nabungon iti puraw a selopin ti 6 nga elongated bundles. Naputipotan dagiti bungon iti scotch tape.

Sakbayna, nakaawat ti Bakun police station iti impormasion a maysa a lalaki a nakasakay iti PUV ti mangibiahe iti napagango a marihuana a naikabil iti karton ket agturong iti La Trinidad, Benguet babaen iti Alilem, Ilocos Sur a lumasat iti Sudipen, La Union.

Dagus a nakikoordinar ti Bakun police station iti Sudipen ken Alilem police stations mainaig iti nasao nga impormasion.

Nangipasdek dagiti polis-Sudipen iti checkpoint iti manamnama a pagnaan ti sasakayan a nagluganan ti suspek idinto a sinurot ti polis-Alilem ken polis-Bakun ti PUV nga asidegen iti nagbeddengan ti Alilem, Ilocos Sur ken Sudipen, La Union.

Apaman a nakadanon ti PUV iti Barangay Poblacion, Sudipen, dimsaag ti suspek, bagkatna ti karton a masuspetsa a naggianan dagiti marijuana bricks ngem ditoyen a nagtignay dagiti polis manipud iti tallo a police stations ket ginammatanda ti suspek sada kinumpiska ti iggemna ken impan iti Sudipen police station para iti dokumentasion ken umisu a disposision.

Inimbentario dagiti polis dagiti nakumpiska a droga iti sanguanan ni Barangay Captain Teresita Cabaccang ti Poblacion ken maysa a reporter manipud iti Bombo Radio, San Fernando City, La Union.#