Maibiahe a marihuana, nasaed dagiti polis iti checkpoint

ALILEM, Ilocos Sur – Naminsan pay a napaneknekan ti kinapateg ti nainget a panag-checkpoint dagiti polis iti pannakatiliw itay nabiit ti dua a lalaki a mapapati a mangipuslit iti maiparparit a droga manipud ditoy nga ili.

Iti report manipud iti polis ditoy nga ili, bayat ti panagisayangkatda iti anti-criminality operation iti Through Cut road, Sitio Macdaar, Barangay Poblacion ditoy nga ili idi malem ti Septiembre 26, pinarada ti maysa a nangisit a TMX 155 motorcycle a minaneho ni Joel Larioza, residente iti Barangay Del Pilar, Tagudin, Ilocos Sur, kasakayna ni Edimar Ocfemia y Baroña. 20, ken residente iti Barangay Bario-an, Tagudin, Ilocos Sur ket idi sinitada ni Larioza, naduktalanda nga awan ti lisensia daytoy.

Bayat ti pannakaipan dagiti dua iti police station, kellaat a nagtaray ni Larioza. Kimmamat dagiti polis ngem nalibasan ida ti suspek.

Kasta met a pinakaskas ti drayber ti sumarsaruno a TMX motorcycle ti luganna idi pinasardeng dagiti polis. Naglugan dagiti polis iti patrol car ken motorsikloda ket kinamatda ti motorsiklo.

Bayat ti panangkamatda kadagiti suspek, nakita dagiti polis ti panangipalladaw ti back rider ti dua a pakete a nabungon iti pagiwarnak ken maris-berde a cellophane a naputipotan iti scotch tape nga idi inspeksionenda idi agangay ket naglaon gayam iti napagango a bulong ti marihuana nga addaan fruiting tops ken mapattapatta nga agdagsen iti sumurok kumurang dua kilo.

Gapu ta nagsuspetsada a kadua dagiti naglugan iti maikadua a motorsiklo ni Ocfemia, inaresto dagiti polis daytoy.

Natiliw met babaen kadagiti agindeg iti Sitio Palasipas, Barangay
Dalawal, Alilem sa naipaima iti polis ti maysa kadagiti naglugan iti maikadua a motorsiklo a nabigbig a maysa a John Arvin Paguergan y Laplana, 18, baro, high school graduate, ken residente iti Barangay Kabulanglangan, Tagudin, Ilocos Sur.

Nakalibas ti back rider a nainaganan laeng a “Dick”.

Agtultuloy ti pannakabirbirok kada Larioza ken “Dick”.

Mapapati a maibiahe koma dagiti pakete iti patad, partikular iti Tagudin dagiti pakete ti napagango a marihuana agsipud ta taga-Tagudin amin dagiti natiliw a suspek agraman ni Larioza a nakalibas.#