Maika-125 anibersario ti panagkasangay ni Apo Pidiong, narambakan

VIGAN CITY – Rinambakan ti Ilocos Sur ti maika-125 nga anibersario ti panagkasangay daydi nag-Presidente Elpidio Quirino babaen ti panangilungalong ti gobierno probinsial ken daytoy a siudad itay Nobiembre 16.

Dimmar-ay iti selebrasion dagiti agtuturay iti probinsia a pakaibilangan da Gov. Ryan Singson, dati a Gov. Luis “Chavit” Singson, Vigan City Mayor Eva Marie S. Medina, ti grupo ti Order of the Knights of Rizal nga indauluan ni Supreme Commander, Bokal Jeremias Singson, nagduduma a personalidad ken dadaulo dagiti ahensia ti gobierno.

Sakbay ti programa, naangay ti misa conselebrada sadiay St. Paul Metropolitan Cathedral ken ti floral offering iti sakaanan ti monumento daydi Apo Pidiong iti dayaen ti provincial capitol.

Naiyawat pay ti maysa a posthomous award kas pammigbig kadagiti nagapuanan daydi immuna nga Ilokano a nag-presidente iti pagilian.

Kinuna ni Cory Quirino, anak ti dati a First Lady ti pagilian a dakkel ti kaipapanan iti pamiliada ti pannakailagip daytoy a panagkasangay ni Apo Pidiong. (Edison Raboy, TVigan)