STA. CRUZ, Ilocos Sur – Sumurok-kumurang 3,000 nga umili ti sinerbian ti Ilocos Sur Hotline, ti programa iti radio ti gobierno probinsial, kas paset ti panangselebrarna iti maikasangapulo ket tallo a tawen nga anibersariona ditoy nga ili idi Agosto 25.
Kas pagyaman ti programa iti awan sarday a suporta dagiti kaprobinsiaan, naisagutan dagitoy iti adu a regalo babaen ti naaramid a raffle draw. Nadumaduma nga appliances ken aruaten ti balay ken premio a kuarta ti naited kadagiti nagasat a timmabuno.
Naikkan iti wheel chair, sarukod ken regalo dagiti senior citizens manipud ken ni Gov. Luis “Chavit” Singson ti 1000 a senior citizen.
Inaprobaran pay ni Singson ti pannakaited ti P1 milion a pondo ti Sta. Cruz Bileg Cooperative. Naikkan pay iti pondo ti assosasion dagiti empleado ti gobierno municipal ken pondo a pangleppas iti principal’s office ti Dili Elementary School.
Babaen ti Baluarte Massage Center, naipaayan iti libre a masahe dagiti timmabuno.
Pinagyamanan ni Mayor Teresita Valle ti pannakapili ti ilida a pakaangayan ti anibersario ta naikkan met iti gundaway dagiti kakailianda a maserbian ti Ilocos Sur Hotline.
Kiniddaw ti mayor ti pannakasimpa ti paset ti provincial road a mamagkakamang iti ili a Sta. Cruz, Salcedo ken Sta. Lucia a nadadael iti nakaro a panagtudtudona.
Impanamnama ti gobernador nga agtultuloy ti programa nga Ilocos Sur Hotline a mangipaay iti serbisio kadagiti taga-Ilocos Sur kangrunaanna iti benneg ti medikal ken dental ken pagpatulongan dagiti kaprobinsiaan nga agparparikut sadiay ballasiw-taaw.
Manipud idi Mayo daytoy a tawen, inrugi ti Ilocos Sur Hotline ti dimmanon kadagiti nadumaduma nga ili iti probinsia a pangipaayan iti serbisiona. (Mancielito S. Tacadena)
