Maika-4 a SONA ni Pres. Aquino, ania ti makunam, kabagis?

Salaysay ni Jobert M. Pacnis

(Maikadua a paset)

 

Sabali pay nga isyo a nadakamat iti SONA, ‘bagis, ti maipanggep iti Philhealth. Panggep kano ti administrasion a maikalawa pay ti sakupna wenno ad-adu pay a kailian, kabagis, ti agmiembro itoy tapno makaramanda met iti talingenngen a maipaay daytoy a programa. Umabot kano laeng idi iti 62 porsiento dagiti miembro. Itan, 81 porsiento! Dagiti saan pay a nadanon daytoy a programa ket kadawyan kano a dagiti kameng ti minoridad wenno dagiti indigenous a kailian. Daytoy ita ti kitkitaen ti administrasion tapno matulonganna dagiti marigrigat.

Saan met a nakaligtas iti SONA dagiti ahensia a dina inaramid ti trabahona. “Nasabon sila” no iti Tagalog. Nagelgelda a kasla lupot. Ngem agingga met iti lapayag ti isem dagiti ahensia a dinayaw ti Pangulo gapu iti dakkel a naaramidanda iti napalabas a panawen.

Nadakamat pay ti maipanggep iti pannakatay dagiti nakemmeg a lider ti Ozamiz Robbery Group a da Cadavero ken Panogalinga. Rumrummuar ngamin iti imbestigasion a rubout ti napasamak kadagitoy isu a napapatayda iti laksid ti kaaddadan iti ima ti linteg. “Agsaganakayo. Asidegen a maam-ammokayo!” kinuna ni Presidente kadagiti pannakabagi ti linteg a responsible itoy a banag.

Gagangay iti politika, kabagis, saan met a nalibtawan ti Presidente a pinasagidan dagiti naglabas nga administrasion. A nakasairan manen dagiti kabagian dagiti maseknan. Nagsapa metten a politika dayta, kinunkunada.

Kastan sa a talaga ti galadtayo a Pinoy, ‘bagis. Pinniltak! Pinniltak! Ta kas nakunak idin, narigat nga aklonen dagiti naaramid a maikaniwas. Kas kenka met laeng, a, ‘bagis. Piltakam dayta karrubam tapno saan laeng a maisentro kenka dagiti pammabalaw.

Ne, dinak ingaran, ‘bagis. Sasawek laeng ti kapaliiwak. Aglalo idi naminsan a napanka ketdin nagal-alang-ang iti isyo a dika met karaman. Nagsasaoka a dika met ammo ti puon ti isyo. Ta kayatmo ngarud ti agpasikat koma met. Ngem ania pay ita? Nagisarka iti bukodmo a manteka!

Ala, adu pay ti dinakdakamat ni Presidente iti SONAna, ‘bagis. Dagiti benepisio dagiti kapulisantayo wenno dagiti mangtengtengngel iti linak ken kappia. Kasta metten ti parikut iti kaawan ti kuriente iti dadduma a paset ti Mindanao. Pannakaingato iti singir iti kontribusion iti SSS uray 0.6% laeng tapno matulongan daytoy nga ahensia ket makalung-aw metten kadagiti adu nga utangna.

Ala, nagpipintas ti report ni Presidente, kabagis. Ngem kas namnamaen, adu latta dagiti nagkutak ta nakuranganda iti SONAna. Kas pangarigan dagiti OFWs. Apay kan’ nga awan man laeng ti nadakdakamat maipanggep kadakuada? Kayatda koma pay met a maammuan no ania ti programa ti gobierno tapno mapatan-ay ti biagda wenno maprotektaranda kabayatan ti kaaddada nga agpatpatagabo iti sabali a pagilian. Apay pay la ngarud kano a naawaganda iti “baro a bannuar” no kasta met laeng a maipapaigidda?

Diakon sawen dagiti dadduma, ‘bagis. Ket adda kenkan no ania met  ti makunam itoy a SONA ti presidentetayo. Ta kas nasaon, sika/datayo met laeng nga umili ti pudpudno a makaammo kadagiti mapaspasamak.

Ti laeng makunak, agsalukagtayo latta ketdi. Agtrabahotayo kas mayataday kadagiti nabalitokan nga aw-awid. Ditay’ mangpasakit. Ditay’ lattan agsadag iti tulong ti gobierno, iti pagiliantayo.

Kuna ngarud ti maysa a lider: dimo saludsoden no ania ti maipaay/naipaay kenka ti pagilianmo. Saludsodem ketdi no ania ti maipaaymo kenkuana.

Ala, kabagis, saannak koma ngarud kagurgura, a? Uray la dayta kaadda ti kappia iti isipmo ti maipaaymo iti pagiliam.#