Footer

Maikatlo a Tour of Ilocos Sur, maangay

TAGUDIN, Ilocos Sur – Maangay ti maikatlo a Tour of Ilocos Sur inton Abril 28-Mayo 1 babaen ti panangorganisar ti Ilocos Sur League of Civil Societies ken Ilocandia Bikers Organization, impakaammo ti tour director ti torneo.

Kinuna ni Bokal Jose Bonuan, tour director ti torneo nga addaan daytoy iti uppat a laps a pakaibilangan ti Vigan-Sinait, Sinait-Tagudin, Tagudin-Cervantes ken Cervantes-Vigan.

Kinuna ni Bonuan a gagem ti torneo ti bisikleta a makadiskobre kadagiti nalalaing a siklista a mabalin nga isalip ti probinsia kadagiti nailian a torneo kasta metten a maitandudo dagiti napipintas a lugar iti Ilocos Sur a pagdalanan dagiti siklista.

Impakaammo ni Bonuan nga iti naangay nga elimination round idi Pebrero 21, uppat a pulo ket walo manipud iti nasurok 50 a partisipante ti kualipikado a makisalip iti tournament proper.

Nagpuesto iti umuna agingga iti maikasangapulo a puesto da Carlo Gazmen, Jemico Brioso, Kelvin Mendoza, R-Jay Pescador, Ryan Serapio, Harold Mark Gelacio, Randolf BaHaga, Michael Bryan Juguilon, Leonardo Palor Jr. ken Onofre Buc-ong. Dagiti immuna nga innem a siklista ti agbalin a team captains iti innem a grupo.#