Maikkanda iti gundaway nga agbalbaliw

IDI 2006, nayimplementar ti R. A. No. 9344 wenno Juvenile Justice Welfare Act a mangprotektar iti kalintegan dagiti naglabsing iti linteg nga ubbing nga agtawen iti nabbaba ngem 18.

Ngem iti baet daytoy, kapaliiwan a saan a naikkan iti naan-anay nga implementasion daytoy a linteg.

Agingga ita, rinibu ti bilang dagiti ubbing a naikursong kadagiti pagbaludan a kaludonludon dagiti mammapatay, rapists, mannanakaw ken dadduma pay a napeklan a dakes a ruot ti kagimongan.

Mapattapatta a rinibu dagiti naiyaw-awan nga ubbing a nakaaramid iti panaglabsing iti linteg a naikursong kadagiti nailet a pagbaludan, kalagudlagud dagiti nadagdagsen ti kasoda a nataengan.

Segun iti Social Welfare and Development, adda nasurok a 4,000 a nakabalud nga ubbing iti sapasap a pagilian gapu iti nakaaramidda iti maikaniwas iti linteg.

Iti daytoy a bilang, nasurok a 300 ti nakabalud iti New Bilibid Prisons, 590 ti naikursong kadagiti pagbaludan dagiti siudad, 406 ti nakapupok kadagiti detention cells ti polis ken 367 ti adda iti babaen ti kustodia ti lokal a gobierno wenno nongovernment agencies.

Saan koma a rumbeng a mapasamak ti kastoy agsipud ta iti daytoy a situasion, ad-adda laeng a mabinorda nga agbalin a dakdakes gapu iti inpluensia dagiti maton ken miron a kalangenlangenda iti pagbaludan. Iti iruruarda iti pagbaludan, ikuyogdanto dagiti dakes a nasursuroda kadagiti nataengan a balud ket imbes nga agbalbaliwda, agbalindanto a sabali pay a dakes a ruot iti kagimongan.

Rinibu dagiti ubbing nga agsagsagaba iti pagbaludan  idinto nga addada koma iti rehabilitasion a pakaaturan iti dakes nga inaramidda maikontra iti kagimongan ken ti aglawlawda. Ubbingda ket adda pay la gundawayda nga agbalbaliw ken mangtallikud kadagiti dakes nga aramid ken bisioda.

Dayawenmi ngarud ti Plan Philippines iti panangipublikarna ken panagiwarasna kadagiti booklets para iti naan-anay a pannakaadal ti komunidad, nangruna ti kapolisan, dagiti opisial ti barangay, social workers ken dadduma pay a sektor iti kagimongan no kasano maikkan iti naan-anay a pannakataming dagiti ubbing a naglabsing kadagiti paglintegan. Agtaud ti mabusbos a gatad iti $274,000 grant nga inted ti Dutch government.

Mangnamnamakami a babaen ti pannarabay ti Plan Philippines, maguyod ti atension ti gobierno tapno maruk-atan metten dagiti rinibu nga ubbing a nakakursong kadagiti nadumaduma a pagbaludan iti pagilian idinto nga addada koma kadagiti rehabilitation centers tapno matulonganda a mangbalbaliw iti kinataoda ken maakayda nga agbalin a nalinteg nga umili iti panagsublida iti sidong ti kagimongan.#