Mailako a balikutsa, agkurkurang

VIGAN CITY – Agkurkurang ti balikutsa a mailaklako iti probinsia iti baet a dumakdakkel ti demand iti daytoy a produkto.

Kanaig daytoy, indagadag ni Vice Governor Deogracias Victor Savellano ti panagmula iti ad-adu pay nga unas a pagtataudan iti maaramid a tagapulot ken balikutsa.

Kinuna ni Savellano a kasapulan nga umad-adu dagiti mannalon nga agmula iti unas tapno masupusopan ti panagkurang ti balikutsa iti probinsia gapu iti umad-adu nga aggatang iti daytoy a produkto.

Iti agdama, magatang iti P25.00 ti maysa a pakete nga aglaon laeng iti sangapulo a balikutsa.

Ditoy probinsia, adda payen dagiti otel, eateries ken restaurant a balikutsa ti itedda a pangtempla iti kape imbes nga asukar.#