sinursuran-banner-sqSinursuranNi Jobert M. Pacnis

Maipamaysa Koma ti Kalintegan Dagiti Ubbing

Kolum: Sinursuran

Ni Jobert M. Pacnis

(Maikadua a paset)

 

Ket daytoy ti pagar-ariwawaan dagiti grupo a mangkitkita iti kalintegan dagiti ubbing. Masapul kano a madusa dagiti nakapanunot itoy nga ay-ayam. Naabuso kano dagiti kalintegan dagiti ubbing. Ngarud, maysa a kaso daytoy ti pannakaabuso. Ket adda dagiti linteg a mangdusa kadagitoy a panaglabsing. Adda dita ti anti-child abuse law. Mabalin met ti anti-pornography law ta naalaan dagiti ubbing iti ladawan ken bideo  a mabalin a nagwarasen iti internet.

Itoy a pasamak idiay Cavite, nalawag a maysa a kita ti pannakaabuso dagiti ubbing. Ket dagiti adda iti likudan daytoy a pasamak, mabalin a makasuanda.

Ania ti mabalin a pannusa?

Dose agingga iti duapulo a tawen a pannakaibalud.

Nupay kasta, saanen a maisubli ti dati a panagtalek dagiti biktima iti bagbagida!

Saan laeng a ti ama-ti-ili ti nasao nga ili ti mabalin a makasuan itoy. Kasta metten dagiti sabsabali nga opisial nga adda kadayta a paay-ayam, dagiti nagbuya kangrunaan kadagiti nagala iti ladawan ken bideo; ken dagiti amma a nangpalubos kadagiti annakda.

Tapno saan nga agbalin nga al-alia daytoy a pasamak kadagiti ubbing a nausar iti nasao a pay-ayam, napateg ti pannakaiwayat kadakuada ti counseling. Nga agtaud kadagiti eksperto!

Saan laeng a dagiti ubbing ti agdalan iti counseling. Kangrunaan ti amin, dagiti nagannak. Isuda ti kaskenan itoy nga addang. Tapno mailawlawag kadakuada dagiti pagdaksan ti kastoy nga ay-ayam iti panunot dagiti ubbing. Mawarwar kadakuada ti akemda a kas nagannak. Ta saan man met nga asi-asi ti akem a kabulon ti panagbalin a nagannak.

Kadagiti met opisial wenno lider iti sosiedad, awan ti karbenganda a mangrienda iti masakupanda no kastoy ti panagpampanunotda. Saan nga umanay ta maparagsak laeng dagiti iturayan—a saanen a kitaen ti kalintegan dagiti inosente a maar-aramat.

No adalentayo daytoy a pasamak, mabalin a simrek iti panunot ti opisial a nasayaat a pangala iti imatang dagiti umili ti nasao nga ay-ayam. A dakkel la ketdi ti maitulongna kadaytoy masungad a basingkawel.

Ta, wen, malagipdanto ti naganna inton panagbubutos gapu iti liwliwa nga intedna iti maysa nga aldaw iti biagda. Liwliwa a nakapayatan met ti kalintegan dagiti inosente!

Ita a masursurat daytoy, pagpipiestaan met ti media ti pasamak iti biag da Kris (Aquino) ken James (Yap) a dati a lakayna. Adda daytoy agsupadi a reklamo ti tunggal maysa. Ken siempre pay, no ania ti ibato ti bangir a kampo, tubngaren met ti sabali. Awan ti mangaklon iti maipabpabasol kenkuana.

Daytoy a pasamak, nagbalinen a nasional nga isyo. Di maliklikan a kastoy agsipud ta adda ni Kris iti showbiz kasta met a kabsatna ti agdama a presidente ti pagilian. Inayon pay dita ti kinalatak met ni James a basketbolista.

Kadagiti taga-media, dakkel daytoy (ti panagsubsubang, panagkinnaso dagiti agassawa) a damag a mabalin a mamaglatak kadagiti pagpapaayanda. Kagaten la ketdi ti publiko. Pagangayanna, napandagan dagiti nasional nga isyu nga ad-adda koma a kitaentayo— aglalo ti agdama nga administrasion. Kas koma iti agtultuloy a riribuk idiay Sabah, Malaysia. Dagiti nakapila iti death row a kailian iti ballasiw-taaw. Ti kinakurapay…

Ngem kangrunaan a biktima itoy bimtak nga isyu a Kris-James ket ti anakda a ni Bimby. Mariribukanen itoy a di panagkinnaawatan dagiti nagannak kenkuana. Awanen ti kinapribado ti biagna a di koma a maap-apektaran kadagiti kakastoy a bambanag.  A segun kadagiti eksperto, sigurado a maapektaran ti emosional a rikna ti ubing ken ti mabalin nga aw-awidnanto iti masakbayan.

Daytoy koma ngarud ti kitaen dagiti nagannak ken ni Bimby. Sardengandan dayta awan kaes-eskanna a panagbinnatoda iti ere. Risutenda koma lattan ti problemada iti naulimek a wagas. Adda met ti linteg a mangeddeng wenno pagkamanganda.

Ta di ket maisakripisio ti maysa manen nga ubing!

Agpaay koma dagitoy a pagteng a paratignay tapno saan nga agbalin a biktima dagiti ubbing. Masapul ti panagtitinnulong dagiti nagannak, mannursuro, lider iti sosiedad ken dagiti papadi wenno ministro. Ipamaysada ti mangkita iti pagsayaatan, ken di pannakailupitlupit ti kalinteganda, dagitoy nga ubbing tapno agbalinda a nabunga nga indibidual iti masakbayan. A mabalin a mangyaon iti pagilian iti agdama a kasasaadna.#