: Maipamaysa Koma ti Kalintegan Dagiti Ubbing | Tawid News Magazine - Weekly Ilocos News 📰
sinursuran-banner-sqSinursuranNi Jobert M. Pacnis

Maipamaysa Koma ti Kalintegan Dagiti Ubbing

Kolum: Sinursuran

Ni Jobert M. Pacnis

(Umuna a paset)

 

KADAGITI nagannak, ragsakda dagiti annakda. Dagitoy ti mangmangted kadakuada iti inspirasion iti biag. Dagitoy ti pammaneknek ti kinaan-anayda a nagannak. Dagitoy ti aminda, ti pakabuklanda, ti rason ti kaaddada nga agsaksakripisio. Dagitoy ti sagut ti Dios a rumbeng nga ipateg, ilalaen ken ipaayanda iti naan-anay pannaripato. Ken naranga a masakbayan.

Isu a kas pagsasao, awan ti nagannak a di pagsayaatan dagiti annakda ti kitkitaenda, ti in-unaanda. Aramidenda amin tapno laeng mapadakkelda dagitoy iti nalinteg a dana. A maitedda ti kasapulanda. Kangrunaanna, maisaganada ti masakbayan dagitoy a maiduma la unay iti nagpasaranda. Aglalo la ket ngaruden no isuda a nagannak, rigat ti nariinganda a panagbiag. Agingga’t mabalin, dida kayat a tawiden daytoy dagiti ipatpategda la unay nga annak.

Iti pay laeng panangiyawat dagiti nagannak kadagiti annakda kadagiti pagadalan, dakkelen a sakripisio. Yaradoda ti bagbagida tapno maitedda dagiti kasapulan dagiti annakda. Mangnamnamada met nga aramiden dagiti mannursuro ti obligasionda tapno maitultuloy ti pannakatarabay dagiti ubbing. A no panunoten,ad-adu pay nga oras ti kaadda dagiti ubbing iti pagadalan a kapulapolda dagiti kaklase ken titserda no idilig iti kaddada kadagiti nagannak kadakuada.

Wen, pudno la unay a maikadua a nagannak dagiti mannursuro! Ket dakkel nga obligasion kadakuada dayta. Ta saan laeng a maymaysa, wenno dua, wenno tallo ti taripatoenda. Ketdi, pinulpullo nga ubbing. Saan laeng a sirib ti akemda a yallatiw no di ket makipagmulida met para iti nasayaat a masakbayan dagitoy nga ubbing a naitalek kadakuada.

Ngem di laeng nga iti pagtaengan ken pagadalan ti pakatubayan ti panagug-ugali dagiti ubbing. Di maitarayan ti dakkel nga impluwensia ti aglawlaw. Kas koma ti sosiedad a paggargarawanda; dagiti kapulpulapolda iti inaldaw-aldaw; dagiti nalatak nga indibidual kas koma kadagiti artista, politiko ken dagiti agtrabtrabaho kadagiti lugar-pagdaydayawan.

Ngem itay nabiit, kellaat a bimtak ti maysa a damag a nakadakamatan ti dua nga ubbing. Ditoy, dagiti namnamaen a mangkita koma iti pagsayaatanda, isuda pay ti nangidaulo iti maysa nga ay-ayam a nangabuso iti naganus pay laeng a pampanunotda.

Ti dakdakamatentayo, isu ti pay-ayam ti maysa nga opisial (ama ti ili) kadagiti maysa nga ili ti probinsia ti Cavite.

Ti ay-ayam? Innadayuan ken kinnangatuan iti isbo. Iti literal a pannakaipatarus!

Itoy nga ay-ayam, siempre, adda dayta pannakaipakita dagiti mabagbagi dagiti ubbing— a maysa a kita ti pannakaabuso. Ket dakkel a basol dayta iti linteg!

Ken iti pannakadakamat pay laeng a menor de edad dagiti dua nga ubbing a naglaban iti nasao nga ay-ayam, dakkelen dayta a panaglabsing iti linteg. Ti nakas-ang, dagiti pay met opisial koma a mangkita, mangsaluad ken mangilaban iti kalintegan dagiti ubbing ti nangidaulo itoy a minamaag nga ay-ayam.

Anian a panagpampanunot dagitoy nga opisial!

Maysa pay, adda kano met konsensus dagiti amma dagiti nasao nga ubbing. Sipapalubosda kadagiti annakda! Ta maysa laeng daytoy nga ay-ayam!

Awan ti malisia dita ta ay-ayam laeng,” kinuna pay ti maysa kadagiti amma.

Nagkiting a panagpampanunot. No ngata isuda ti agay-ayam iti kasta, ania ngata met ti mariknada? Kasta met dagiti opisial, ania met ti mariknada no pagkakatawaan dagiti agbuybuya kabayatan ti panagay-ayamda?

Segun kadagiti sikologo, mabalin a kadagitoy a panawen, kasla awan laeng kadagiti ubbing daytoy nga inaramidda. Ngem inton agbaybayag, maaladan ti agbain. Agingga a didan kayat ti rummuar. Agbalbaliwen ti pannakigamuloda iti gimong. Ket baka makagteng iti punto a kaguradan ti lubong.

Ti adatna pay, agbalbaliw kano ti aw-awid dagitoy nga ubbing iti masanguanan. Mabalin nga agbalindanto a bayolente; nga itta iti gimong. Ket mabalin nga adu ti agbalin a biktima iti narusanger a panagug-ugalida a pinarnuary ti nalidem a napalabasda.#