Footer

Maiparit, panagikuyog iti paltog, makapatay nga armas bayat ti election period: Comelec

Maparitanen ti maysa a pribado a tao, agdama nga agturay wenno kandidato ti agikuyog iti armas wenno agiyemplo kadagiti armado a badigard bayat ti election period manipud Septiembre 25 agingga iti Nobiembre 10, daytoy ti linaon ti resolusion nga impaulog ti Commission on Elections idi Septiembre 20.

Iti Resolution No. 9028 a naipaulog idi Septiembre 20, imbilin ti Comelec ti nainget a pannakaipakat ti Seksion 32 ken 33 ti RA 7166 a mangiparit iti asinoman nga agimet, agikuyog wenno agibiahe iti paltog wenno sabali pay a makapatay nga armas kadagiti lugar a publiko, a pakairamanan ti aniaman a pasdek, kalsada, parke, pribado a behikulo wenno publiko a pagluganan, uray no lisensiado nga agikut iti daytoy, no awan ti naisurat nga otorisasion manipud iti komision bayat ti panawen ti eleksion.

Nasuspenso pay ti pannakaiyisio dagiti armas bayat ti election period. Intuding ti Comelec ti 2010 Barangay ken Sangguniang Kabataan (SK) elections a maangay inton Oktubre 25, 2010.

Sagudayen pay ti nasao a probiso a dagiti laeng regular a miembro ti Philippine National Police, Armed Forces of the Philippines ken dadduma pay a law enforcement agencies ti gobierno ti autorisado nga agikuyog ken agikut iti armas bayat ti election period, ngem kasapulan a kompleto a nakaunipormeda ken addada iti aktual a panangannong iti pagrebbenganda iti eleksion.

Sagudayen pay ti Seksion 33 ti RA 7166 a bayat ti election period, awan ti kandidato para iti public office, a pakairamanan dagiti incument public officers nga agngayangay a pailayon iti aniaman a public office, ti agiyemplo, mangala iti serbisio dagiti security personnel wenno badigard, no saan nga intuding ti Comelec, apaman a nagaplikar daytoy.

Nupay kasta, mabalin a maikkan dagiti kandidato para iti barangay ken SK a puesto, asinoman a public officer wenno pribado nga indibidual, iti security personnel wenno badigard no mangipila iti maikanatad nga aplikasion iti Komision nga adda kakuyogna a “threat assessment” manipud iti AFP wenno PNP.

Naipakat dagitoy a probiso ti RA 7166 iti nasional ken lokal nga automated elections idi Mayo 10, 2010 babaen ti Comelec Regsolution No. 8714.#