Maiparit, panaginum arak iti pampubliko a lugar: ordinansa

VIGAN CITY – Inaprobaran ti sangguniang panlungsod ditoy iti third and final reading ti maysa nga ordinansa a mangiparit iti panaginum iti nasanger iti igid ti kalsada, parke, plasa ken dadduma pay lugar a pampubliko.

Kinuna ni Konsehal Joy Bennette Orio, autor iti ordinansa a naawagan iti Responsible Drinking Ordinance, a saan a nasayaat ti imahe para iti maysa a heritage city a kas iti Vigan nga itden ti pannakakita dagiti turista ken sangsangaili kadagiti tattao nga aggiinom iti igid ti kalsada, sango ti tienda ken dadduma pay a pampubliko a lugar.

Innayon ni Orio a saan a sakupen ti ordinansa ti panaggiinom iti uneg ti inaladan aglalo iti pasken wenno piesta.

Mamulta ti aglabsing iti daytoy nga ordinansa iti: umuna a panaglabsing – P300.00, maikadua a panaglabsing – P500.00, ken maikatlo a panaglabsing – P1,000.00.

Exemption iti ordinansa ti pannakaangay ti street dining and drinking iti sidewalk dagiti restaurants agsipud ta adda bayadanda iti city government.#