Maiparit panagsusugal babaen ti lawwalawwa: ordinansa

BANAYOYO, Ilocos Sur – Impasa ti sangguniang bayan ti maysa nga ordinansa a mangiparit iti panagsusugal babaen ti lawwalawwa ditoy nga ili.

Segun ken ni Mayor Severino Galanga, naipasa ti nasao nga ordinansa agsipud iti kapaliiwan a nagbalin a napigsa a pagsusugalan ti panagpapangat dagiti lawwalawwa nga umabot pay iti rinibu.

Iti daytoy a sugal, pagrupaken ti dua a lawwalawwa iti maysa nga stick ket ti umuna nga agtaray a lawwalawwa ti maabak.

Naammuan a nangina ti paggatang dagiti sugador iti maysa a klase ti lawwalawwa a malaksid a naandur, nauyong pay no makipinnangat iti padana a lawwalawwa.#