Footer

Maipaspasuli dagiti umili iti bukodda a pagilian

Adda dagiti kameng ti Gabinete ni Pres. Arroyo nga agparparang nga agir-irigda iti interes dagiti ganggannaet nga agnegnegosio ditoy pagilian ngem iti pagimbagan dagiti kailianda.

Ni Finance Secretary Margarito Teves ti maysa kadagitoy.

Dakamatenmi ditoy ti panangkontra ni Teves iti Senate Bill 269 nga inesponsoran ni Sen. Loren Legarda a mangited kadagiti senior citizens iti exemption iti 20% a buis iti bank savings ken ti panangikeddengna a mapakatan iti nakababbaba a buis iti maysa a brand ti sigarilio a partuat ti ganggannaet.

Unaentayo no apay a kontraen ni Teves ti gakat ni Sen. Legarda.

Dagiti kano laeng babaknang a senior citizens ti mabenepisiaran iti nasao a gakat ta awan ti ania a naidulin dagiti kaadduanna a kapatadanda. Maabuso pay ketdi kano ti nasao a gakat agsipud ta aramaten laeng dagiti babaknang a senior citizens tapno saan a mapatawan dagiti depositoda iti bangko iti buis. Agtungpal daytoy, kunana, iti ad-adda a panagpadara ti buis a kolkolektaen ti gobierno.

Makainsulto daytoy nga argumento ni Teves. Ipakpakitana laeng ti kinababa ti panagkitkitana kadagiti ordinario nga umili a kaadduanna ti retiradon iti serbisio iti man gobierno wenno iti pribado a sektor. Iti imatang daytoy mararaem  nga alter ego ni Pres. Arroyo, mamirmiraut dagiti senior citizens, awan ti ania a naullomda a kuarta iti pinullo a tawen a panagtrabahoda, kasungani kadakuada nga opisial ti gobierno a malaksid iti dakkel a sueldoda, nagadu pay dagiti benepisioda, malaksid laeng ti kinabileg ken kinaturay a naikawes iti posisionda.

Iti sabali a bangir, pinaibabana ti buis a bayadan ti Pall Mall a sigarilio, adayo a nababbaba ngem iti buis nga impataw ti Bureau of Internal Revenue.

Agasem ta P26.06 ti excise tax kada pakete nga impataw ti BIR iti Pall Mall cigarette ngem imbaba ketdin ti Department of Finance nga idadauluan ni Teves iti P6.74 (laeng!) kada pakete.

No patien ni Teves, maibilang a lokal a brand ti Pall Mall, saan nga imported brand a kas iti panangklasipika ti BIR, gapuna a maipataw laeng ti nababbaba a buis.

Uray nanengnengtayo nga agkuenta, minilion la ketdi ti pukaw ti gobierno iti buis a rumbeng koma a bayadan ti nasao a sigarilio a sumrek iti kaha ti turay.

Ita, kuna ketdin ni Teves nga ad-adda laeng nga agpadara ti buis a makolekta ti gobierno no maaprobaran a linteg ti gakat ni Sen. Legarda a mangted iti exemption kadagiti senior citizens iti 20% a buis iti bank savingsda idinto a saan a nagpangadua a nangipababa iti buis ti Pall Mall a pagpukawan ti gobierno iti minilion a buis a kolektaen.

No kastoy ti panagkalkalintegan dagiti opisialtayo, saan a nakakaskasdaaw no apay nga adu nga umili ti makarikna a maipaspasulida kadagiti ganggannaet iti bukodda a pagilian!