Maipatakder a pagadalan, napunduan

CABUGAO, Ilocos Sur – Napunduan ti pannakaipatakder ti pagadalan sekundaria iti Barangay Sisim ditoy nga ili tapno adda pagkuartoan dagiti agbasa iti daytoy a pagadalan.

Kas sungbat iti query ni Konsehal Benedict Savellano no apay a mapunduan ti Sisim National High School idinto nga adda met manamnama a pondona manipud iti nasional a gobierno agsipud ta linteg a nasional met ti pannakabangonna, inlawlawag ni Konsehal Vicky Serna a nabayag ti proseso ti pannakairuar ti pondo ket amangan no saan a maisambot ti pagadalan iti panaglulukat ti klase inton Hunio.

Napunduan iti P1.2 milion ti maipatakder a nasao a pagadalan ket agtaud daytoy iti bingay ti munisipio manipud iti RA 7171.#