Footer

Maiserrek nga animal iti I. Sur, aglasat umuna iti quarantine

TAGUDIN, Ilocos Sur – Nangipasdek ti gobierno probinsial iti quarantine checkpoint iti barangay Bio ditoy iti sanguanan ti panagraira ti sakit ti animal iti Bulacan ken Pampanga.

“Masapul a maipasdek daytoy a mangprotehir kadagiti tarakentayo nga animal kadagiti addaan sakit nga aggapu iti nadumaduma a probinsia,” kinuna ni Savellano idinto nga innayonna a paset daytoy a gannuat iti panangpapigsa iti livestock industry iti Ilocos Sur.

Linuktan itay Agosto 1 ni Gov.Deogracias Victor “DV” Savellano ti pakaikuarantinan dagiti animal iti Barangay Bio ditoy tapno mainspeksionda no adda sakitda wenno awan sakbay a mapalubosanda a maiserrek iti probinsia.

Timmabuno iti inagurasion da PNP provincial director P/Sr. Supt. Jessie Cardona, pannakabagi ti Department of Agriculture, Region I, Sangguniang Panlalawigan Member Robert Tudayan,  Ilocos Sur 2nd Engineering District, District Engineer Rey Elaydo, Vice Mayor Rogelio Lorenzana, ken kameng ti media.

Kinuna ni Savellano a 24 nga oras a maipakat ti quarantine babaen ti panagkikinnamayyet ti provincial government, provincial veterinary office, Philippine National Police, munisipalidad ti Tagudin, Ilocos Sur Polytechnic State College (Tagudin Campus) ken dagiti opisial ken tanod ti barangay Bio.

Kinuna ni Cesar Corpuz, pannakabagi ti DA Region I a naipasdek ti quarantine center tapno masalakniban ti livestock ken poultry industry ti Ilocos Sur kadagiti maiserrek iti probinsia nga animal nga addan sakit.

Inyunay-unay ni Savellano a saan a pagkuartaan ken paggastuan daytoy a gannuat no di tapno matulongan dagiti mannalon iti probinsia.

Kinunana a naipasa ti resolusion a pannakaipasdek ti quarantine center iti Bio, Tagudin idi bise gobernador pay laeng ket iti daytoy a panagtugawna a kas gobernador, “kasapulan ti pannakaipasdekna gapu iti daydiay objective a papigsaentayo ti hog industry ken mangprotektar metten iti probinsia manipud kadagiti sakit nga aggapu iti nadumaduma a probinsia.”

Kinuna ni Savellano a sumarsaruno a maipasdek ti pagkuarantinan iti nagbeddengan ti Ilocos Sur ken Ilocos Norte ken iti boundary ti probinsia iti Abra.

Agraira ti sakit ti baboy iti Bulacan ken Pampanga ket ginasuten dagiti natay.#