Makapungtot a lalaki, nagpapasanna a pinaltogan TV set

CANDON CITY – Nagasat ti bumalay ta nairana nga awan, ta no saan, ginudas ti nangbirbirok kenkuana a nagtagiarmas iti paltog.

Nagreport iti polis ni Bugnay Barangay Captain Maylene Q. Pasic a nagtagiarmas a sinerrek ni Dindo Taoagen y Gallebo, 32, baro, ken residente iti nadakamat a barangay, ti balay ni Nula Gallebo y Tungbaban, 30, naasawaan idi agarup 7:14 ti agsapa ti Enero 10.

Mapapati a sinapul ni Taoagen ni Michael Gallebo nga asawa ni Nula, ket idi mapatalgedanna nga awan daytoy iti balay, pinaltoganna ti telebision iti naminsan sa nagpaputok pay iti naminsan iti ngato a nakalsokan iti bobeda.

Idi nakaruar ti suspek, imbatona pay ti paso ti masetas iti tawa ti balay da Nula.

Nagresponde dagiti polis ket inarestoda ti suspek iti uneg ti balayna ken kinumpiskada ti cal. 22 a revolver a nagmarka iti Ruby nga addaan iti serial no. 35325 ken nagkarga iti uppat a bala ken dua a cartridge iti cylinder.

Saan a nailanad iti report no apay a nagtagiarmas ni Taoagen a nangsapsapul ken ni Gallebo.#