Makarurusok a buyok iti BuCor

SUMNGAWEN dagiti makarurusok a buyok dagiti sigud ken agdama nga opisial ken agserserbi iti Bureau of Corrections kabayatan ti
imbestigasion ti Senate Blue Ribbon Committee ken Committee on
Justice mainaig iti pannakaipakat ti Republic Act No. 10592 wenno Good Conduct Time Allowance Law.

Nangrugi a simngaw ti buyok iti BuCor iti pannakabulgar ken pannakatungday ti nasapsapa a pannakaparuar ni sigud a Calauan, Laguna Mayor Antonio Sanchez a nakombiktaran iti pito a bilang iti Reclusion Perpetua (40 years imprisonment) gapu iti pannakarames ken pannakapapatay ni Mary Eileen Sarmenta, ken pannakapapatay ni Allan Gomez, aggayyem nga estudiante iti University of the Philippine Los Baños idi 1993. Nasentensiaan pay ni Sanchez iti dua a Reclusion Perpetua iti sabali a kaso ti panagpapatay idi 1991 kadagiti agama a Nelson ken Richmond Peñalosa a lider dagiti kalabanna iti politika.

Ti isyu ti naikurimed a pannakawayawaya koma ni Sanchez ken dadduma pay a balud ti gapu nga inikkat ni Presidente Rodrigo Duterte ni Nicanor Faeldon kas BuCor Director General, ken panangdutokna ken ni Melvin Buenafe kas Officer-In-Charge. Ngem nakaskasdaaw ta agtultuloy ti panangdepdepender ti Presidente iti sigud a BuCor Chief. Immandaren ti Presidente ti isusuko dagiti nawayawayaanen a balud gapu iti GCTA Law iti las-ud ti 15 nga aldaw ta no saan ket maibilangda a pugante, ket addan dagiti nasurok a 200 a simmuko. Inaklon ni Justice Secretary Menardo Guevarra a narigat a mapasubli dagiti sigud a balud nga addan iti ballasiw-taaw.

Iti panagtestigo dagiti “resource speakers” iti Senado pakairamanan dagiti opisial ti DOJ, BuCor, PDL ken kapamilia dagiti balud, naduktalan a nagbalinen a panguartaan ti panagbalin a benepisario ti GCTA Law a dagiti napabpaboran ket dagiti addaan iti kuarta imbes a dagiti nataenganen ken masaksakit a balud. Natakuatan a ti pannakaipaay ti espesial a pribelehio dagiti balud, ken pannaikaiserrek dagiti kontrabando ket nagbalinen a panguartaan dagiti rinuker nga opisial ken agserserbi iti BuCor kas ti panagyan iti ospital, panagbisita iti agpatnag ken napaut dagiti pamilia ken mabaybayadan a babbai, panagnaed iti kobol, panagsugal, arak, sigarilio, droga, extra a taraon, cellphone, armas ken dadduma pay nga alikamen a maipawil nga usaren dagiti balud.

Iti imbestigasion ti Senado, natakuatan a saan laeng a ni Sanchez ti prominente ken nalatak a balud a nakombiktaran gapu kadagiti nadagsen a krimen ti nagbalin a benepisario ti GCTA Law. Nairaman pay iti listaan dagiti nawayawayaanen ni Janet Lim Napoles, a nakabalud sadiay Correctional Institution for Women gapu iti kaso a plunder mainaig iti P10 billion Pork Barrel Scam a nakairaman dagiti tallo a senador idi 2013.

Nasdaaw ni Senador Richard Gordon, Chairman ti Blue Ribbon Committee iti pannakairaman ni Napoles iti listaan ta “rape” wenno panagrames ti nakasurat a kaso a nakakombiktaranna imbes a “plunder.” Paglibakan man dagiti opisial ti BuCor a “clerical error” wenno nagbiddut laeng ti pannakaisurat ti kaso ni Napoles, ken dagiti dadduma pay a nairaman iti listaan dagiti benepisario ti GCTA Law. Sino ti mamati iti dayta nga ulbod a rason ket pagaammo ti publiko a plunder ti kaso ni Napoles agraman dagiti sigud a senador a nabalud a da Juan Ponce Enrile, Jinggoy Estrada ken Ramon “Bong” Revilla Jr., a nakasublin iti Senado?

Iti listaan, nairaman pay a nawayawayaan dagiti kombiktado iti pannakapapatay dagiti agkabsat a Maryjoy ken Jacquelyn Chiong iti Cebu idi 1997, dagiti sigud a polis a nasentensian iti kaso ti frustrated murder ni Myrna Diones ken pannakapapatay dagiti dua a kasinsinna idi 1992, ken dadduma pay a “celebrated cases” iti naglabas.

Ti kadadaksan kadagiti nawayawayaanen a balud ket dagiti lima a ganggannaet a convicted drug lord, uppat kadakuada ti sigud a nakakulong iti New Bilibid Prisons, ken maysa iti Davao Penal Colony. Ti pannakaikurimed a pannakawayawaya dagitoy a drug lord ket ipaneknekna ti bangking a pannakaipakat ti hustisia iti Pilipinas gapu iti kurapsion.

Makapadismaya ta nagbalin a linteg ti GCTA Law idi 2013 ken nairugi a naipakat idi 2014, ket iti kadagupan dagiti agarup 2,000 a nawaya-
wayaanen ket kaaduanna ket dagiti nakaaramid iti nadangkok a krimen ken nawayawayaanda kabayatan ti agdama nga administrasion a ti sentro wenno flagship program-na ket panangpaksiat ti kurapsion, kriminalidad ken panagraira ti illegal a droga.

Iti panagtuloy ti imbestigasion iti Senado, mapaliiw ti publiko ti gandat a mangiyaw-awan iti umno a turongen ken pudno nga isyu ta maipabpabasolen a ti depekto ket ti Implementing Rules and Regulations ti GCTA Law a naaramid iti naglabas nga administrasion, imbes a dagiti opisial a nangiproseso ken nangaprobar iti saan a tumutop a pannakawayawaya dagiti balud a saan a kualipikado nga agbalin a benepisario.

Makarurusok ti pannakiraman iti imbestigasion ni Senador Ronald de la Rosa ta uray iti ababa a panawen a panagbalinna a BuCor Director General kalpasan ti panagretirona kas Chief ti Philippine National Police, ket inaklonna nga inaprobaranna ti pannakawayawaya dagiti agarup 200 a balud agraman ti maysa a drug lord, ken kaaduaanna ket murderer ken rapist a ti rasonna ket impakatna laeng ti linteg. Saan kadi nga idi tiempona kas PNP Chief a nainget a naipakat ti Operation Tokhang ket inaldaw-aldaw dagiti adu a napapatay nga adda pannakainaigna iti illegal a droga a kaaduanna ket dagiti napanglaw ken awanan-gaway?

Saan koma a mayaw-awan ti imbestigasion ti Senado ket saan laeng a ti pannakaamendar ti GCTA Law ti aramidenda, ngem irekomendada ti pannakaidarum dagiti amin a nangabusar iti posisionda iti BuCor. (EAAlviar)