Makatawen kalpasan pannakapapatayna, hustisia di pay naited ken ni Judge Lacasandile

TAGUDIN, Ilocos Sur – Sino ti nangibilin iti pannakapapatay ni Judge Reynaldo Lacasandile?

Makatawen kalpasan ti pannakapapatay ti executive judge ti Regional Trial Court Branch 20, Vigan City, daytoy pay laeng ti agtaltalinaed a saludsod iti panunot dagiti dimmar-ay iti First Death Anniversary ti nasao a judge a naangay iti auditorium ditoy nga ili idi Oktubre 4.

Karaman kadagiti nakipaglagip iti nasao a pagteng dagiti hues ken empleado dagiti nadumaduma a korte iti sibubukel a probinsia ken nasurok a 300 nga estudiante manipud kadagiti nadumaduma a pagadalan ditoy nga ili.

Iti agsapa ti nasao nga aldaw, maysa a misa ti naisayangkat para iti hues idinto a naangay iti malem ti prayer services babaen kada Rev. Feliciano Bugtong, Jr. ken Fr. Bernard Gonzales, panagibasa da Atty. Geraldine Ramos ken Atty. Rowena Lorenzana dagiti passages iti Biblia, responsorial psalm ni Atty. Alma Grace Lee-Omengan, Gospel reading ni Judge Mario Anacleto Bañez, sharing ni Fr. Cristeto Cortez ken prayers of the faithful babaen ken ni Atty. Emmalou R. Molina.

Nalagip ti biag daydi Judge Lacasandile kas ama babaen ken ni Danielle Lacasandile nga anakna; kas kabaddungalan, babaen ken ni Judge Cecilia Corazon Dulay-Archog; ken kas kailianna babaen ken ni Mayor Roque S. Versoza, Jr.

Ni Fiscal Robert Canosa, nagpaay a Clerk of Court ti Tagudin Regional Trial Court sakbay a naipromot iti agdama a saadna, ti nangipaay iti mensahe iti nasao nga okasion.

Nagyaman ni Vilma Lacasandile, asawa ti hues, kadagiti dimmar-ay iti pannakalagip iti umuna nga anibersario ti pannakatay ti asawana.

Maipalagip nga idi parbangon ti Oktubre 4, agur-uray ni Lacasandile  iti luganna iti igid ti national highway a sakup ti Barangay Lacong, Tagudin nga agpa-Vigan City idi inasitgan ti dua a suspek a naglugan iti motorsiklo sada pinaltogan.

Awanen ti biag ti biktima idi maidanon iti ospital.

Sumagmamano a suspek ti kinasuan ti National Bureau of Investigation mainaig iti pannakapapatay ni Lacasandile a pakairamanan da Benson Sudario Alviento, Rodrigo Urman, Henry Galapate,  maysa nga agalias iti “Temy”, ken tallo a John Does kalpasan a simmuko iti NBI ni Urmin, kameng ti Alviento Group a mapapati a nainbolbar iti drugs ken gun running activities iti maikadua a distrito ti probinsia.

Ni Urmin ti mapapati a drayber ti motorsiklo a naaramat a getaway vehicle iti pammapatay.

Intudona ni Alviento a triggerman iti krimen.

Natiliw met idi Hunio 8 idi napan a tawen iti maysa a pagpallotan iti  San Gabriel, La Union da Candido Mitrado, 49, ken Peter R. Tagura, 52, dua a sabali pay a suspek iti pammapatay.

Nakumpiska dagiti polis iti ikut dagiti dua ti saggaysada a cal .45 nga addaan iti magasin a naglaon kadagiti bala.

Iti eksamen nga insayangkat ti Regional Crime Laboratory kadagiti paltog, nakumpirma  nga agpada ti ballistic markings dagiti kapsula a narekobre iti nakapapatayan ni Lacasandile ken iti paltog a nakumpiska iti ikut ni Mitrado.

Nupay kasta, awan pay ti naglawaganna no asino ti nangibilin iti pannakapapatay ni Lacasandile.

Mapapati a work-related ti motibo ti pammapatay.

Ni Lacasandile ti maika-21 a hues a napapatay iti pagilian manipud pay idi 1999.#