Footer

Makina a pagtalon, kalding ken para pallot a manok, natakaw

SANTA, Ilocos Sur – Dua a makina a mausar iti panagtalon ken tallo a kalding naireport a natakaw idi Hunio 26 iti Santa PS.

Nakaawat ti Santa PS iti agarup oras 6:40 idi agsapa ti Hunio 26, ita a tawen, a mapukpukaw ti maysa a Kubota RK70 diesel engine a kukua ni Raffy Queddeng y Cardenas, 37, naasawaan, mannalon; maysa a China-made deisel engine karaman ti bomba ti danum a kukua ni Edmund Castillo y Asuncion, 46, naasawaan’ ken tallo a kalding a kukua ni Freddie Cabbab y Castillo, 39, awanan asawa. Agindegda amin iti Brgy. Pantay Tamurong, Caoayan, Ilocos Sur.

Mapapati a kinurimes dagiti di pay ammo ti kinaasinoda a tao a mabalin nga adda luganda a nangilugananda kadagiti tinakawda idi rabii ti Hunio 25.

Mapattapatta a P55,000.00 ti balor dagiti natakaw.

MAYSA pay a panagtakaw ti inreport ni Punong Barangay Adjutor Queppet ti Brgy. Naguilian, Caoayan, Ilocos Sur iti Caoayan PS idi Hunio 26 ita a tawen iti agarup oras ti 8:45 iti agsapa, a mapukpukaw ti lima a para pallot a manok ni Dante Arce y Castro, 45, naasawaan, Brgy. Kagawad, ken residente iti Brgy. Camanggaan, Vigan City.

Iti inisial nga inbestigasion, naammuan a nakagalut dagiti manok iti arubayan a masarakan iti Naguilian, Caoayan, a kukua ti biktima.

Mapapati a tinakaw dagiti di pay ammo a tao, dagiti manok iti agarup nagbaetan ti oras ti alas 2 ken alas 4 iti parbangon ti Hunio 26 ita a tawen.

Agbalor ti P15,000.00 dagiti natakaw a manok. (Tawid News Team)