Maladaga nga intaray ti GRO, naisalakan dagiti polis

CANDON CITY – Impakaammo ti polis ditoy a nayendorson iti city prosecutor’s office ti kaso maikontra iti maysa a guest relation officer a nangitaray iti maysa a maladaga idi Hulio 28.

Nakakustodia iti agdama ni Mary Grace Tugadi y Villaresis, 25, balasang, ken residente iti Blk. 25, Lot 20, Country Miles, Carsadang, Imus, Cavite gapu iti panangitalawna ken ni Althea Coca, walo-aldaw pay laeng a maladaga nga anak da EmeritoJ. Coca ken Cristine Sablang, aglib-in, ken residente iti Barangay Paras, Candon City.

Narekobre dagiti polis ti ubing manipud ken ni Tugadi babaen dagiti polis-San Fernando a pinakdaaran dagiti polis ditoy kalpasan a nakaawatda iti mensahe a limmugan ti suspek iti maysa a bus nga agpa-Manila.

Segun iti inisial nga inbestigasion dagiti polis, idi agarup alas 3:00 ti malem ti Hulio 28, imbati da Coca ti anakda iti aywan ni Tugadi tapno mapanda mangala liti birth certificate ti ubing iti City Health Office. Idi simmangpet dagiti agassawa iti balayda, awanen ti anakda agraman iti suspek.

Maysa a di nainaganan nga umili ti nangipakaammo kadagiti agassawa a nakitana a limmugan ti suspek iti Dominion Bus Line a kargana ti ubing.

Nagpatulong dagiti agassawa iti polis ket nagturong dagitoy iti terminal ti nasao a bus sada kinontak ti konduktor a nangkumpirma nga adda pasaheroda a babai nga adda kargana nga ubing.

Nangipatulod dagiti polis iti flash alarm iti San Fernando police station tapno pasardengenda ti bus a nagluganan ti suspek.

Nangipasdek dagiti polis-San Fernando iti checkpoint iti  Barangay Pagdalagan, San Fernando City ket ditoy nga inarestoda ti suspek sada insubli ti ubing kadagiti polis Candon ken kadagiti nagannak daytoy.#