Maluktan koma ti ridaw ti kappia

ITI waragawagna itay nabiit, kinuna ni Jose Ma. Sison, pundador ti Partido Komunista iti Pilipinas, a nakalukat ti ridaw iti pannakaituloy ti patangan iti kappia iti nagbaetan ti gobierno ken dagiti komunista a gerilia.

Nasayaat daytoy nga addang ni Sison tapno aggibus metten ti agganay 40 a tawen nga insurhensia iti pagilian a nakabuisan dagiti nagkaadu a biag ken nakaibukbokan dagiti pundo nga imbes koma a naipaay kadagiti programa a pakaidur-asan ti panagbiag dagiti umili ngem naigatang laeng kadagiti armas a pangungaw iti biag.

Ti rigatna, saan a maikkat ti panagduadua iti kinasinsero ti agsumbangir para iti pannakaragpat iti naan-anay a kappia.

Iti biang ti grupo dagiti komunista a rebelde, adu dagiti demandada a kayatda a maipakat sakbay ti panagsublida iti lamisaan para iti patangan ti kappia kas iti panangisardeng ti militar iti all-out war nga indeklarana kontra kadagiti komunista a gerilia, ti pannakaisardeng iti pannakaabuso iti kalintegan dagiti militante a grupo ken mapapati a kumankannigid a kritiko ti turay, dagiti extrajudicial killings a mapapati nga iwaywayat ti militar kontra kadagitoy a grupo ken iti panangipakat iti agdama a turay iti naing-inget nga addang tapno mapukaw iti panagraira ti panagkunniber ken kurapsion kadagiti nadumaduma nga ahensia ti turay.

Iti sabali a bangir, kuna ti turay nga ar-aramidenna dagiti nasken nga addang tapno magun-od ti kappia babaen ti panangawisna kadagiti rebelde a gerilia iti isusukoda babaen ti amnestia a programa ti gobierno. Mainaig kadagiti dadduma a demanda ti Tignay, kuna ti turay nga ar-aramidenna iti kabaelanna a mangpugipog iti panagkunniber ken korapsion kadagiti nadumaduma nga ahensia ti gobierno, kasta met iti panangbukelna kadagiti body a mangkita kadagiti pammapatay ken pannakaabuso a maipabpabasol iti militar tapno maikkan iti pannusa dagiti nakabasol.

Ala, nasayaat a pangrugianan ti inruangan ni Sison. Piduten koma daytoy dagiti agtuturaytayo tapno adda pagsasabatan dagiti pampanunot, arungaing, tarigagay ken panggep para iti pannakagun-od iti nabayagen a dardarepdepen a panagturay ti kappia iti pagilian.

Maysakami kadagiti mangnamnama a babaen ti inlukat ni Sison a ridaw, adda sumrekan  ti turay ken ti grupo ti rebelde a komunista  nga agsubli iti lamisaan para iti peace talks aglalo ket umasideg manen ti Paskua. Iti daytoy a panawen, kasapulan ti panagraira ti ayat ken kappia, saan ketdi a panagdidinnangir ken panagpipinnatay. Datayo laeng ti  kakaisuna a kristiano a pagilian iti Asia.  Awan koma iti bokabulario ti tunggal Pilipino ti kinadamsak, kinadangkok, kinatiri, ken kinadangkes a maiturong iti padana met laeng a Pilipino.

Ti saludsod: masibbol kadin ti kappia iti panagturay ni Pres. Arroyo?#