Mamayor, sinupiatda ti singasing a total ban iti panagkalap iti ipon

NARVACAN, Ilocos Sur -Sinupiat
dagiti local chief exectives nangruna dagiti addaan barangay iti
asideg iti baybay ti maysa a singasing a mangiparit iti panagala iti
ipon ditoy probinsia.

Insingasing ni Mayor Jesus Sagay ti Lidlidda bayat ti miting ti liga dagiti mamayor ti panangbukelda iti maysa a resolusion a maiturong iti Sangguniang Panlalawigan tapno totally a maiparit ti panagkalap iti ipon.

Kangrunaan a panggep ti nasao a resolusion ti naan-anay a pannakapaadu dagiti ikan iti baybay ken pannakaaywanda iti panagdakkelda.

Agruar ti ipon iti kabaybayan ti probinsia manipud iti Setiembre agingga iti Marso.

Ngem saan nga inayonan dagiti mamayor nga addaan kadagiti coastal barangays ti nasao a singasing agsipud iti mapapati a pannakaapektar daytoy a pagsapulan dagiti mangngalap.

“Saan a mabalin daydiay,” kinuna ni Mayor Jeremy Jesus Bueno III iti Santa idinto nga inlawlawagna a nupay adda paglintegan a mangiparit iti panagkalap iti ipon idi dekada 70, naamendaran ti nasao a linteg ket mabalin nga agala ti ipon.

“Wen, mabalin ti agala iti ipon… kasapulan laeng a sumurot iti regulasion nga inyetnag ti national government,” kinuna ni Bueno idinto nga innayonna nga ordinansa ti munisipio ti Santa a mang-regulate iti panagkalap iti ipon.

Kinuna ni Bueno a maysa a probision ti nasao nga ordinansa ti ilina ti panakaiparit ti panagkalap iti ipon iti tartaraudi nga aldaw ti iruruarda.

“Kinuna ti mayor a daytoy ti ipakpakatda iti Santa ket mairaman ditoy ti panakaiparit iti panagaramat iti bukatot ken dadduma pay nga illegal a panagkalap..

Insingasing ni Mayor Edgar Zaragoza, presidente ti LMP, nga addan kadagiti ili ti panagaramidda iti bukodda a resolusion a maiturong iti Sangguniang Panlalawigan. (Danny Antalan)