Mammapatay a riding in tandem, gimmudas manen

BANTAY, Ilocos Sur – Nangbiktima manen dagiti mammapatay a nagkalubbon iti motorsiklo a sabali manen a pakabuongan ti ulo dagiti polis ditoy nga ili.

Pinaltogan dagiti armado a lallaki a riding in tandem ni Lawrence Paz y Cortez, 41, naasawaan, residente iti Zone 4 ditoy nga ili iti agarup alas 10:45 ti Nobiembre 24 iti kalsada nasional a sakup ti Barangay Balaleng.

Dagus a natay ni Paz gapu iti sugatna iti ulona.

Segun iti inisial nga inbestigasion dagiti polis, agdaldaliasat nga agpaamianan da Paz, kaluganna ni Rose Jean nga asawana, ket idi makadanonda iti nadakamat a barangay, inabay ida dagiti nakahelmet a suspek a naglugan met iti motorsiklo sa pinaltogan ti maysa iti namindua a daras ti ti biktima.

Nagsagrap iti garumiad iti nadumaduma a paset ti bagina ni Rose Jean, ket naitaray iti ospital.

Nakarekobre dagiti inbestigador iti dua a kapsula manipud iti cal. 45 iti nakapasamakan ti krimen.

Iti pannakaisurat daytoy, awan pay ti nabigbig a nangisayangkat iti pammapatay.

Mapapati a nainbolbar iti droga ti biktima iti napalabas ngem saan a nagdur-as ti kaso.

Idi laeng malem ti Nobiembre 9, pinapatay dagiti di pay nabigbig a suspek a nagkalubbon iti motorsiklo ni Fire Officer III Antonio Cariño y Folledo iti met laeng national highway a sakup ti Barangay Boquig ditoy nga ili.

Segun iti polis, adda met kaso ti pammaltog ni Cariño iti napalabas ngem mapapati a nadismis ti kasona.#