CANDON CITY – Nagpulong iti polis ti maysa a manager ti beerhouse gapu iti panangkabil kenkuana ti maysa a kustomer gapu iti mapapati a dakkel unay a bayadanda iti nainomda.
Nagpulong ni Wilyn Valencia, addaan iti naan-anay nga edad, manager ti Tik Tak 2, residente iti barangay Paras, Candon City, a kinabil ti maysa a Junior Garbo, alias “Bala”, addaan iti naan-anay nga edad, agnaed met laeng iti Barangay Paras.
Iti inbestigation, nagiinom ti suspek ken uppat a kaduana iti nasao a beerhouse ket nagriri ti suspetsa gapu iti dakkel a bayadanda.
Mapapati a tinungpa ti suspek ti biktima sana induron idinto nga inruarna ti balisongna.
Nagtaray ti biktima iti kuarto ket dita a dimmawat iti tulong iti polis. (Danny Antalan)