Manager ti beerhouse, napapatay

CANDON CITY.  Natay ti agtagikua ken manager ti maysa a beerhouse ditoy idinto a  nasugatan ti uppat a sabsabali pay idi pinaltogan ida ti maysa a lalaki iti sanguanan ti Hardrock Videoke House a masarakan iti barangay Paras iti daytoy a siudad.

Natay ni Juanito Chua y Garces, 51, operator ti nasao a beerhouse, ken residente iti barangay Ayusan, Santa Lucia, Ilocos Sur; ken nasugatan da Jonifer Chua, 24, DJ; Claire Becsal, 21, GRO, taga-Bacoor, Cavite; Jomar Moreno, 24, waiter, taga-Cebu City ken ni Reynante Banizal, 35, residente iti Oaig Daya, Candon, security guard.

Saan a nabigbig ti suspek a pimmaltog kadakuada.

Naammuan iti inbestigasion ti polis a kudkuditen ni Chua ti selponna iti abay dagiti empleadona a madama nga agtotong-it iti sanguanan ti videoke bar idi immasideg ti suspetsa a nakalugan iti XRM motorcycle ket pinaltoganna ti biktima iti namin-adu a daras a puon ti nakatayanna a dagus.

Iti baet dagiti sugatna, nabaelan ti biktima ti timmaray iti uneg ngem ditoy a napasag.

Inasut ti security guard ti paltogna tapno isalakanna ti amona ngem inunaan a pinaltogan ti suspetsa.

Nakarekobre dagiti inbestigador iti crime scene ti 6 a kapsula ti kalibre 45.

Di pay ammo ti motibo ti pammapatay.