Sarita ni Danilo S. de Guzman

Maikalima a paset

“Rimmimbawen, nagaburan ngatan ti nauneg nga abut nga iimutan ni kasinsin,” inyillek ni Uliteg Sebing idi mailinged ni ikit. Nagkakatawakami met.

“Managparanud ni kumari, kunayon sa. Kas ‘tay kunadan a pagraranudan ti imbag. Asinoman a managparanud, ad-adu pay ti grasia a sumangpet a di man la aggudeng ken agsanud!” nakuna ni Nang Ising a nagkiremkirem, umis-isem a manglanglangit, a nalabit ti pannakairanudna met iti sinigang nga ulo, ta paboritona ket ti napiasan nga ulo ken  agsepsep iti mata ken ngiwngiw ti oriles.

Iti pannakangngegko iti insawang ni Nang Ising a managparanud ni Ikit Banang, kellaat a simmangbay manen kaniak ti karkarna a rikna a mangipasimudaag iti eksena iti masakbayan wenno big event a kunkunada. Ania ngata, aya, daytoy? Kasla met la dataon tungngiib nga agpugpugto iti angin!

NASIGANGEN dagiti ul-ulo, ip-ipus, bagbagis, nagkudilan ken uray ti nagsiitan ket inramanda ta adda pay la  sangabassit a kimpet a lasagna. Uray la agalingasaw ken makapabisin ti banglona. Naiwa-iwan iti naingpis dagiti sadiwa a laslasag nga isiwsiw iti wasabi ken soy idi sumangpet ni Ikit Banang. Naggapu iti makinlaud a purok, a nalabit nga inna nakiay-ayaman iti pusoy dos, nga uso met nga ay-ayam-sugal a pagpalnedan ti oras sadiay a purok.

Addakami iti sango ti tiangge ni Nang Ising, nga iti daytoy a gundaway ket nakatugaw iti palangka ken agsursurat iti kuaderno a naiparabaw iti makin-uneg a paradipad ti tiangge kabayatan iti panangnanamna iti kilawen nga oriles, adda ti sangaplatito a lasag ken sabali pay ti naiplatito a natimplaanen iti soy a wasabi ken naiparabaw met laeng iti makin-uneg a paradipad ti tiangge ken ti puraw a mug a naglaon iti kaldo ti sinigang nga inyawat itay ni Uliteg Sebing.

Agngatngatingat da Binan, Tomas, ken Uliteg Sebing, idinto ta ipugpug-aw ni Bong ti insakmolna a kilawen a naisiwsiw iti wasabi, mulmulenglengan da Kanor ken Victor dagiti pulotan idi sumungad da Nang Filing, Nang Ikka ken Nang Masang.

“Naudikamin!” pammasungad ni Nang Filing.

“Karugrugina ti session! Welcome to sukmoners club!” inrungiit ni Uliteg Sebing.

Session dagiti mannukmon, kunak koma met nga ipasaksak, ngem inatipak ti dilak, kalpasan a nautobko a nasaysayaat lattan no agulimekak.

“Hihayyit! Hihayyit! Hunak hu halalaw hamin!” imbeddal ni Nang Masang a lukmeg ta ammalna manen ti Hope a sigariliona ngem makin-uneg ti apuy wenno makinruar ti filter, a nakairuamannan a panagpayubyob.

Nagrupanget ken naglibbi dagiti nakangngeg.

“Ania a hihayyit nga ibagbagam met, bakka!” imbikag ni Nang Ikka.

“Sinal-it ketdi a kasal-itan met, kumari, dikanto la maipugtit nga umuna met dayta ammalmo sakbayka a sumao!” inggarakgak ni Uliteg Sebing a nakaisurotan ti amin.

Nagdardaras nga immatras ni Nang Masang, nagtallikud sana impugtit ti ammalna iti igid ti alad, nagsubli ket kinunana a magagaran: “Nangabakka manen, mari?”

“Nasurok laeng a sangagasut a pisos,” insungbat ni Ikit nga immisem.

“Daytoy ti ekstension ti hapihapitayo idi kalman!” kinuna ni Nang Masang, “Bongga, a kuna dagiti bakla!” Ngem dina naituloy ti garakgakna ta naklaat idi nasiputanna iti dagus ken maar-arakattot a panangidisso ni Nang Filing ti naimallukong a sinigang ken agpugpug-aw a mangipaypaypay ti kanawan a dakulapna iti ngiwngiwna. Nagmulagatkami iti naimatanganmi.

“Ti dangnga itoyen a bakbaketan!” inggarakgak ni Nang Masang, “Igupenna lattan nga ipanerper ti digo a dina man la pug-awan nga umuna!”

“Hammok haya a nahuhot hayam!”

Naggagarakgakkami manen iti nangngegmi a beddal a panagrason ni Nang Filing.

“Nasayaat laeng no di agkabbibaw dayta bibigmo, dangnga!” insungbat ni Nang Masang.

Napno manen ti katkatawa. Ti ragragsak ti kapurokan ket saan a magatadan. Ta daytoy ti nakairuaman wenno taal nga ugali.

MINALEM  a nalatak ni Ikit Banang. Isu a kanayon ti bida. Isu ti kanayon a taya iti sukmonan iti tiangge ni Nang Ising. Agpapulotan pay. Ket no kastan a dandanin panagtabon ti init, napnon dagiti nahilig a tumilmon iti sammigel. Naipaugalin iti purok daytoy. Ngem saan ketdi a panagrennek iti pirpirmi no di ket umanay a bandingan laeng wenno pinnasig dagiti pumurok. Daytay man pagsasanguan a pagsasaritaan, pagtututtotan a pakaibuangan dagiti garakgak ken paggaak, ti sinnutil ken gantil, kas ita manen a malem.

“Umaymo ramanan ti warekwarek, Terry!” inlaaw ni Nang Ikka. Warekwarek kunami iti dinakdakan dagiti Anggalog. Warekwarek no babassit ti pannakaiwana, ragaraga met ti pangawagmi no  kakasla kadakkel ti kaha ti posporo ti iwana, maysa nga ilgat ket husto a sangasakmol, maysa a klase ti luto iti lugarmi ngem addaan iti dua a nagan maigapu daytoy iti presentasion  ti kadakkel ti pannakaiwa. Dayta ragaraga no maminsan ket adda pay ti bersionna nga isiwsiw iti dara a nailuto ken natemplaan laeng iti suka, laya, lasona, asin ken sangapirit a betsin.

Ti warekwarek ti pulotanmi ita a malem.

(Adda tuloyna)