Sarita: Manang Dalia (Umuna a paset) | Tawid News Magazine - Weekly Ilocos News 📰

Manang Dalia (Umuna a paset)

NAGPAKADAAK kadagiti adalak iti 7-Ayuyo apaman a naibaga ni Dexter ti naibilin kenkuana. Papaayabannak ti prinsipalmi. Ammok lattan no apay. Inreportko itay sakbay ti flag ceremony ti napasamak idi kalman a kaawanna ta adda dinar-ayanna a meeting idiay Division.

“Sumrekka,” kinuna ni Mr. Daludal a prinsipalmi idi agtuktokak iti opisinana.

Pudno ti atapko. Addan ni Marko ken ni Manang Dalia a nanangna a pinaayabak idi kalman. Nakatugawda iti sango ti lamisaan ti prinsipalmi.

Nagdaydayawak. Ngem nakakusilap ketdin ni Manang Dalia. Kumilaw dagiti matana.

“Agtugawka,” kinuna ni sir.

Nagyamanak. Kaabayko ni Marko; bale nagtengngaan met ken ni Manang Dalia.

“Kayatko nga agsasaritatayo iti puso iti puso,” inrugi ni sir.

“Yes, sir,” kinunak. Kinitak dagiti agina.

“Ay, mayatak dita, sir,” kinuna ni Manang Dalia nga iti panagkunak, apaglabes la a kuarentana. In-inauna la ngata iti tallo tawen ti naubing ken kabarbaro pay laeng a prinsipalmi.

“Sige, barok,” minira ni prinsipal ni Marko, “saritaem man ti pudno a napasamak idi kalman. Daytay laeng pudno, a?”

“Wen, sir,” kasla kasiguraduan ni Marko a simmungbat. Ngem nasiputak dagiti dua a gemgemna a nakair-irut ti panangkaemna. Kasla kayatdak a danogen.

Immanges iti nauneg ni Marko idinto a nakakusilap latta kaniak ni Manang Dalia. Itay pay laeng met a tiptipdek ti bagik ta malagipko manen ti napasamak idi kalman. Ngem inatipak ti riknak.

“Binaonnak ni Ma’am Mildred ‘di kalman, sir,” inrugi ni Marko. “Mapanko kano alaen ti attendance dagiti 4P’s ti nagannakna idiay 7-Ballasi,” sa kinitak a kasla dumuklos. “Ngem pinabainannak…” ta kaslaak lattan aso nga inngusona.

Agsaoak koma ngem inunaannak ti prinsipalmi. “Kasano a pinabainannaka ni sir-mo, barok?” inamadna.

“Tinallikudannak idiay ridaw, sir, ket kunana a didak sungsungbatan dagiti ubbing a nagsaludsodak,” agtigtigerger a sungbat ni Marko.

“Kasta kadi ti maestro, sir?” inallawat a dagus ni Manang Dalia. “Imbes nga ipakitana ti naimbag a sursuro… ngem saan!”

“Aguraykayo, manang,” kinunak. “Sakbay nga agsaritakay iti kasta, denggenyo koma pay ti biangko.”

“Agurayka, barok,” simngat ti prinsipalmi. “Nag-excuse-ka kadi idi napanka iti klase ni sir-mo?”

“Wen, sir. Ngem pinabainannak ketdin. Nagkakatawa pay dagiti Grade 7!”

“Ania met ti makunam, sir?” kinitanak ni Mr. Daludal.

“Pudno nga immay iti pagklasklaseak ni Marko, sir,” nabannayat a kinunak. “Ngem saan a pudno a nag-excuse. Nagdiretsuanna a nagdamagan ‘diay ubing nga adda iti ridaw. Kasla awanak a nakitana iti room.”

“Nagekskiusak idi sir ngem dinak nangngeg,” inyagaw ni Marko a nangaton ti timekna.

“Paayabak ti sibubukel a klase tapno paneknekanda no nag-excuse-ka?”

“Sige, paayabam ida!” awan as-asin ni Manang Dalia. “Kinuniaam ketdi ngata idan, a, ta baliktadenyo ti anakko!”

“Aguraykayo,” insengngat manen ti prinsipalmi. “Pudno a nag-excuse-ka nga immuna, barok?” ni manen Marko ti kinitana.

“Wen, sir. Ngem dina la ngata nangngeg ta madama idi nga agisursuro. Isu a nagdamagakon iti estudiantena nga adda iti ridaw!”

“Ala, paayabantay’ man ngarud ‘diay ubing a nagdamagam,” kinuna ni sir.

Inawagan ni sir ti guardiami ket binaonna daytoy iti 7-Ballasi. Idi agsubli, kaduanan ni Joylyn, ti ubingko a nagdamagan ni Marko.

“Basang,” kinuna a dagus ni sir ken ni Joylyn, “adda la damagek kenka. Sika ti nagdamagan ni manongmo a Marko idi immay iti klaseyo idi kalman?”

“Agsaoka la iti pudno!” imballaet ni Manang Dalia. Nasiputak la unay ti panangkusilapna iti ubing.

“Wen, sir,” agtigtigerger a sungbat ni Joylyn. Napabutngan sa.

“Sakbay a nagdamag, nangngegmo kadi a nag-excuse nga immuna?”

“Saan, sir. Nagdiretsuannak a nagdamagan…”

“Salawasaw!” imbugkaw a dagus kenkuana ni Marko. “Saanmo ngata a nangngeg, a!”

“Ulbod a babai!” sa pay la insaruno ni Manang Dalia

“Pudno, anti.”

“Ania ti dinamagna kenka, basang?” sinaludsod manen ni sir.

“Damdamagenna met no adda turniliok, sir.”

“Turnilio? Apay dayta turnilio?” masmasdaaw ni sir.

“Ania a turnilio ti sasawem?” inyingar ni Marko ken ni Joylyn. “Salawasawka!”

“Ammok, ‘ya, kenka, manong,” irinsaibbekenen ni Joylyn. “Angaw-angawennak idi agdamdamagka.”

“Nangngegyo ti kinuna dayta ubing, manang,” kinunak ken ni Manang Dalia.

Ngem imbes nga agpakumbaba, isu pay ti adda ganasna nga umingar. “Ulbod dayta nga ubing, sir!” impanalbaagna. “Tuleng met ngata, a, isu a dina met nangngeg ti panagekskius ‘ta anakko!”

“Manang, kasano koma a dina mangngeg ket adda a mismo iti ridaw ti tugawna?”

“Naglawag dayta sinao ti anakko, sir. Nagekskius kano! Dimo la nangngeg!”

“Agtalnatayo koma, ading,” awan latta ti mailadawan a panagbaliw iti tenor ti prinsipalmi. “Addatayo ditoy ta pagsasaritaantayo ti napasamak.”

“Ket no balbaliktadenna met ‘ta anakko, sir!” nakatadtademen ti kusilap ni Manang Dalia kaniak.

“Marko,” kinunak, “di kad’ inasitganka pay iti ridaw ket dinamagka no ania ti masapulmo idi nakitak a kasarsaritam ni Joylyn?”

“Wen!” pangas latta a sungbat ni Marko. Inruarna ti paniona ket imputipotna iti gemgemna. Agsagsagana?

“Ngem dinak latta sinungbatan a dagus. ‘Attendance-yo kano a 4P’s!’ kinunam latta nga impukkaw. Idi addaakon a mismo iti sanguanam, isu pay laeng ti panag-excuse-mo, saan?”

“Saan met, a!” naingar latta. “Kunak la ngaruden a nagekskiusak ngem dim nangngeg ‘diay immuna.”

Nagpangasen! “Nagsaon ni Joylyn…”

“Salawasaw dayta!” intudona ni Joylyn a kumkumiet iti iking ti lamisaan ni sir.

“Ammom, sir,” bangbangir ti libbi ni Manang Dalia kaniak. “Nagadu a mangmangngegko kenka dita ruar. Saanakon a masdaaw ita,” inngilangilna pay.

“Ne, agurayka, manang,” kinunak a nadlawak ket kasla kayatna nga ibaliw ti patangan. “Ania man dayta mangmangngegyo a sasaoda, awan ti pakainaiganna ditoy.”

“Adda, sir. Isu met laeng nga adu ti manggurgura kenka ta nalaingka a mangpabain ken nauyongka unay!”

(ADDA TULOYNA)