Manglaylay met ni ayat (Maikadua a paset)

Sarita ni Ronald M. Azurin

 “Ania ti madamag?” diak intaltalek ti pammasagidna.

“Awan,” insungbatna a sila-lab-ay. “Naragsakka, a.”

“Nakaay-ayat ngamin dagiti ubbingko.”

“Mariknak ket saan a dayta ti gapuna,” nasiputak ti itataliawna ken ni Erning.

“Kitaem daytoy, rugianna manen,” nakunak. “Agingga ita, dimo pay la kadi kapkapnekan ti riknak?”

“Imbagak la ngaruden nga adaywam dayta nga Erning!”

“Nasayaat met ti ipakpakitana.”

“Makitam, ikalintegam pay. Siguro, adda met riknam kenkuana, ania?”

Dimi napupuotan ti yaasideg ni Erning. Tinapikna ti abaga ni Eugene.

“Pari, manganka ditoyen,” nakunana. “Inlak-amandaka.

Saan a simmungbat ni Eugene. Nagbanang-es nga immadayo. Simmurot iti bunggoy da Cora ken Milagros, babbalasang a mangisursuro iti Vigan Central School.

“Dispensarem koman ni Eugene, Erning,” nakunak. “Napudot laeng ti ulona.”

“Awan aniamanna,” insungbat ni Erning.

Awan arimekmekko a nagsubli iti lamisaan. Intuloyko ti naglagip iti lasona. Naglumen ti ganaygayko. Diak nagustuan ti impakita ni Eugene.

SAAN nga immamingaw ni Eugene iti pangngaldaw. Nakilanglang kada Cora. Bassit ti nakanko. Nagulimek dagiti kakaduak. Sangkakitada ni Eugene iti ummong dagiti babbalasang.

Nairugi ti scout palabas. Dinagdagnak ni Erning a mapan agbuya ngem impambarko nga adda pay trabahuek. Nagkumegak iti toldak ket namrayak ti nagbasbasa a pinangpalnedko iti oras.

Malemen idi aggawid dagiti simmarungkar. Inurayko ni Eugene nga agpakada ngem intarusna iti lugan. Nakiabay ken ni Cora. Kasla nasippit ti pusok. Ngem pinatangkenko iti nakemko. Saan a siak ti nagbasol, apay ketdin nga agpakumbabaak?

MAYSA kadagiti kangrunaan nga adalen dagiti scouts ti map ken compass reading ken panangtandaan kadagiti landmarks tapno saan a mayaw-awan iti kabakiran. Daytoy ti karikutan a pangsuot iti maysa nga scout.

Inummongko dagiti ubbingko. Inikkak ni Roel, ti patrol leader iti kompas ken sangapirgis a papel a nakaisuratan dagiti bilin a surotenda iti panagdaliasatda iti kabakiran nga agturong it objective area. Iggem ni Roel ti wagaywayda. Rat patrol ti nagan ti tropada. Imetda dagiti alikamenda, kas iti sangametro a nakawikaw a tali, lanseta, paginuman ken dadduma pay a kasapulan iti panagdaliasatda iti kabakiran.

“Are you ready, Rat Patrol?” inamadko.

“Rat Patrol is ready,” insungbat ni Roel.

“Alright, proceed!”

Nabilin metten da Erning, Manang Lita ken Mang Maning dagiti ubbingda. Sabali a direksion ti surotenda ngem agsasarakdanto amin iti objective area.

Linintegmi ti dalan nga agturong iti objective area. Dimi narikna ti bannogmi ta sinarsarita ni Erning dagiti nakatkatawa a padasna iti scouting. Pagyamanak ta saan a nagbaliw ti pannakilangenna kaniak. Kasla awan ti aniaman a napasamak iti nagbaetanda ken ni Eugene.

Kalpasan ti maysa nga oras, nakadanonen ti Dog Patrol ni Erning iti objective area. Simmaruno ti Cat Patrol ni Mang Maning ken ti Horse Patrol ni Manang Lita.

Awan met laengen dagiti ubbingko. Sangkawanawanko ti sungadan. Kinantiawannak ni Manang Lita.

“Mabalin nga adda nakatalaananda,” nakuna ni Erning.

“Umun-unakami ngaruden.” nakuna ni Mang Maning. “Mapanmi isagana ti pangrabiitayo.”

“Mabatiak pay,” nakuna ni Erning. “Kadkadduaek ni Bising.”

Nakaangesak iti nalukay idi masaripatpatak dagiti ubbingko a sumungad. Sinabatko ida.

“Apay a nagbayagkayon?” inamadko. “Diyo kadi nasurotan ti nailanad a bilin?”

“Samman, Ma’am,” insungbat ni Roel. “Binirbirokmi ngamin ni Robert. Dimi met nasiputanen ti naturturongna.”

Diak nakatimek. Numona ta adda gargarawigaw ni Robert. Anianto manen ti masao ni Eugene no maammuanna ti napasamak? Kaanakanna ni Robert.

“Erning, sikan ti mangiyawid kadagiti ubbing,” nakunak. “Innak sapulen ni Robert.”

“Sige,” insungbatna.

“Makaammokayon nga agluto iti pangrabiiyo, wen?”

“Wen, Ma’am,” insungbat ni Roel.

Sinurotko ti desdes a nagnaan dagiti ubbingko. Pinukkawak ni Robert. Awan simmungbat. Dandanin lumnek ti init.

Intuloyko ti nagsawar. Awan latta ni Robert. Pukkawak a pukkaw. Agraeden ti timekko. Madanaganakon. Inkararagko nga awan koma ti dakes a napagteng ni Robert.

Nagpukkawak manen. Awan latta ti simmungbat. Nadaripespesakon iti ling-et. Makasangsangitakon iti naglaok a danag ken bannogko.

Nasipngeten. Karkarawaekon ti dalanko. Idi agbalawak, nayaw-awanakon. Saanen a masirip ti tangatang iti kapuskol dagiti kayo. Ad-adda manen ti butengko. Numona ta awan ti lente a naikuyogko.

(Maituloyto)