Manglaylay met ni ayat (Maudi a paset)

Sarita ni Ronald M. Azurin

 

Nagtugawak iti nagrungarong a ramut ket umanges-angesak a nangisadag iti ulok iti puon ti kayo. Nagkidemak. Pinasimbengko ti riknak.

Inkeddengko ti panagintekko iti yanko. No agdakiwasak iti kasipngetan, ad-adda laeng a mayaw-awanak. Ammok a madanaganen da Erning. Sigurado nga umaydak biroken.

Simgar ti dutdotko idi kellaat a nagiriag ti mangrabrabii a tumatayab sa nagpayakpak nga immadayo. Nasipatko ti barukongko. Nagkidemak ket nagkararagak. Diak payen intaltalek dagiti nasakit a kagat dagiti lamok-bakir.

Diak ammon ti kabayagko iti nagtugawak. Napatengngaagak idi makangegak iti pukkaw. Naggapu iti adayo a laud. Naulit manen ti pukkaw.

“Addaak ditoy!” pinagtim-bukelko ti dakulapko. “Addaak ditoy!” Nagurayak. Naawagan manen ti timekko. As-asideg itan. Impigpigsak ti sungbatko.

Madamdama, nakitak ti lawag nga agakar-akar kadagiti sanga ken bulong.

“Ditoy!” impukkawko.

“Bising?” timek ni Erning.

“Wen, siak,” nakunak. Tinarayko nga inarakup ni Erning. Nagsangitak iti barukongna.

“Huston, naisalakankan,” nariknak ti aprosna iti buokko.

“Ni Robert!” immibbetak. “Diak pay nasarakan!”

“Addan iti kampo. Simmurot gayam iti sabali a patrol.”

“Yaman pay, Apo,” nakaangesak iti nalukay.

“Intan,” nakuna ni Erning. “Madanaganen dagiti kakaduata.”

Pinetpetan ni Erning ti dakulapko ket sinurotmi ti dalan nga agturong iti pagkampuan.

KINITAK ti oras iti pungupunguak. Alas singko gayamen. Inagawaak nga inleppas ti sursuratek iti pisara. Kalpasanna, tinnannawagak dagiti ubbingko. Nakadalusdan iti aglawlaw ti kuartomi.

“Ala, ibellengyon dagiti naruotanyo ta aggawidtayon,” nakunak. Nagpakada dagiti ubbing. Inalikumkomko dagiti libro ken kuadernok. Rummuarak koman idi masaripatpatak ni Erning a sumsumrek iti pagadalan. Insardengna ti motorsiklona iti abayko.

“Kumusta ti mutia ti Capangpangan?” inyisemna.

“Adtoy, napigsa met a kumugkugtar,” insungbatko. “Ita man pay a nayaw-awanka ditoy?”

“Adda paited a surat ni superbisor ken ni Misis Castro,” insungbatna.

“Nagawiden ni Misis Castro,” nakunak. “Itedmo la kaniakon ta iyawatkonto laengen no bigat.”

“Lumugankan ta itulodka,” nakuna ni Erning. “Barbareng no makaraman datao iti merienda.”

“Bay-amon no dayta laeng ti panggepmo,” inlibbik.

Adda nagbanurbor iti sanguanan ti pagadalan. Ni Eugene! Kasla kinirog nga udang ti rupana. Dakes ti nagparikna kaniak.

“Innakon, Bising,” impakada ni Erning. “Uray ket adda metten ni pari Eugene a mangitulod kenka.”

“Agurayka, pari,” inggawid ni Eugene ti takiag ni Erning. “Agpatangta iti nalapat.”

“Nakainomkan sa,” nakunak.

“Dika makibiang,” nagubsang ti timek ni Eugene.

“Ania kadi ti pagpatanganta pari?” inamad ni Erning.

“Diak impagarup a maysaka a karasaen, pari!”

“Lawlawagem ti agsarita, pari.”

“Agindidiammoka pay laeng,” imper-ak ni Eugene. “Agwarwaras iti distrito ti napasamakyo iti kabakiran!”

“Saan a pudno ti damag!” nakunak.

“Duduakayo iti kabakiran. Imposible nga awan ti naaramid!”

“Nagbaba metten ti panagkitam kaniak!”

“Dumarang uray naata a kayo no maisungrod iti apuy,” ingngirsi ni Eugene.

“Bulbulsekennaka laeng ti panagimonmo, pari,” nakuna ni Erning.

“Ulbod!” imbanang-es ni Eugene ket timmayaben ti gemgemna. Naiparusisi ni Erning. Nagaruyot ti dara manipud iti nabtak a bibigna.

“Awan ti bainmo!” inyikkisko ket dinandanongko ni Eugene.

Ginutta ni Eugene ti takiagko ket inwalinnak. Naidaramudumudomak.

Dinuklos ni Eugene ni Erning ngem nakatakderen ni Erning ket pinasabtanna ni Eugene iti makapleng a danog iti panga. Naariweng ni Eugene. Maysa pay a danog ti nagdisso iti rusokna. Napaarukong ni Eugene a nangapput iti tianna. Nanalteek manen ti timidna ket kasla tukak a nabaliktad iti karuotan. Saanen a makatakder.

“Diak ginundawayan ni Bising, pari,” umanges-anges ni Erning. “Saan a napingasan ti dayawna.”

Saan a nagtimek ni Eugene. Namrayanna a pinunas ti dara a nagbalay iti subsobna.

“Gapu iti inaramidmo napukawen ti panagraemko kenka,” nakunak. Inuksotko ti singsing iti ramayko ket imbarsakko iti sanguananna.

“Addayta ti singsingmo. Manipud ita, diak kayaten a makita pay ti rupam!”

Saankon nga intaltalek ti panangawag ni Eugene kaniak. Kinamakamko ni Erning. Nagpaitulodak iti balay. Nariknaak iti talged iti sibayna.#