Manglaylay met ni ayat

Sarita ni Ronald M. Azurin (Umuna a paset)

AGKANKANTA dagiti service scouts iti camping songs bayat ti panagdaliasat ti Ford Fiera nga inarkilami a pagluganan ngem diak nakadanggay. Adayo ti yuyeng ti panunotko. Malmaldayak. Nagsubangkami ken ni Eugene, ti kaayan-ayatko. Dinak kayat a sumurot iti delegasion a makitaripnong iti Provincial Jamboree a maangay iti Barisbis, Santa. Ni ngamin Erning, scout coordinator iti Ayusan Community School, ti pangulo ti delegasion.

Pagim-imonan ni Eugene ni Erning. Nagsalisalda ngamin iti ayatko. Kinapudnona, ni Erning ti magusgustuan dagiti dadakkelko. Awan ti bisiona. Nagaget pay. Naglawa ti bangkag a minulaanna iti natnateng. Nasurok a sangagasut dagiti tarakenna a manok. Uppat ti takongna. kumpleto ti dua kadsaaran a balayna iti kabaruanan nga alikamen. Ngem ni Eugene ti nakatnagan ti riknak. Nupay kasta, saan a nagbaliw ti nasayaat a pannakilangen ni Erning kaniak. Inawatna a sitatakneng ti pannakapaayna.

“Oy, nabatin sa pay la ti karkarmam iti Vigan,” kinalbitnak ni Erning.

“Awan ti gaganaygayak,” insungbatko.

“Hep, baka iliwitis dayta,” nakunana. “Narigat dayta a sakit, awan ti agasna.”

“Hus, ti la manutsutil ti ammom,” kinusilapak.

Kinurengreng ni Erning ti gitarana. “Ayanmo, Dungngo,” inyayugna. “Pangaasim, umaykan ket mailiwen ‘toy puso.”

“Talaga a sutilka a napeklan,” kinuddotko ti bakrangna. Nagkatawa da Mang Maning, maestro iti Raois Elementary School ken Manang Lita, mangisursuro iti Bulala Elementary School.

“No dikanto pay la ngamin dagdagen ni Eugene nga agkasarkayo,” nakuna ni Manang Lita. “Ayna, narigat ti mabaketan a balasang, sika.”

“Agpayso dayta, Manang,” insungbat ni Erning. “Numona ket naglam-ek ti parbangon. Nagrigat ti awan kaulesna.”

“Erning, a,” minulagatak. “Masemsemakon, ne.”

“Saan kadi, a,” nakunana. “Ad-adda nga umuneg dagiti kuretret iti rupam.”

“Oy, agbainka,” nakunak. “Kakaisuna a nalinis ti rupak.”

“Agwayakayo, ubbing,” nakuna ni Erning, “ket addan sa sumangpet a bagyo.”

“Bagyo, kunam, sir?” nagmalanga ni Roel, ti patrol leader ti Rat Patrol. “No nakalawlawag met ti tangatang.”

Saanko a naituloy ti layatko.  Naisursurotak a nakipagkatawa kada Erning.

ALAS TRES ti malem idi makadanonkami iti pagkampuan. Adun dagiti delegasion a naggapu iti nadumaduma a paset ti probinsia ti nakaipasdeken iti tolda a pagturoganda. Adda ti pagkampuan iti sakaanan ti Bantay Kimmallugong. Iti daya, agkankanta ti nalitnaw a baresbes.

Indissaagmi dagiti gargaretmi. Tunggal ubbing, adda pagrebbengan a naipakumit kenkuana. Nabiit a naipataker ti pagturogan ken paglutuan. Nagpakali ni Erning iti pagibellengan iti rugit ken pagiblengan. Innem amin dagiti toldami. Agkaiddakami ken ni Manang Lita. Bagi met da Erning ken ni Mang Maning ti sabali a tolda.

Dandanin lumnek ti init. Binilinko dagiti aywanko nga ubbing a mangisagana ti pangrabiida. Tunggal patrol, makaammon nga agluto. Saanen a nasken pay nga ipalagip kadakuada ti akemda.

Nalipatak ti samuyengko iti kinaragsak dagiti ubbingko. Nabisinanda unay ket naikisap ti sida. Ittip laeng ti natidda.

Inyayab ni Manang Lita ti pannanganmi. P