Mangmangged iti Rehion 1, naingato ti ganarenda iti P14/inaldaw

SAN FERNANDO CITY – Naingato iti P14/inaldaw ti ganaren dagiti mangmangged ditoy Region 1 nangrugi tattay Hulio 19.

Segun iti Department of Labor and Employment, iti baro a wage hike adjustment, agganaren dagiti mangmangged iti inaldaw iti P227 manipud iti dati a P213 ket maited daytoy iti dua a tranches.

Kinuna ni DOLE Director iti Ilocos Grace Ursua a maited ti umuna a P7.00 a wage hike apaman nga agepekto ti pammilin ken ti sabali pay a P7.00 inton Disiembre 1, 2015.

Nupay kasta, saan a karaman iti wage hike dagiti katulong, drayber ti pamilia, empleado dagiti rehistrado a Barangay Micro Business Enterprises, kasta met dagiti agluglugi a negosio, baro nga establisimiento ti negosio, retail/service establishments nga agiyempleo iti saan a nasursurok ngem 10 a mangmangged, ken dagiti establisimiento a nakaro a naapektaran dagiti kalamidad ken didigra.

Agdagup iti 118,847 a mangmangged nga agtrabtrabaho iti 45,542 a micro establishments iti rehion ti mabenepisiaran iti nasao a wage hike.#