Mangngalap, bilog, ginuyod nabanniitan nga ikan

SAN ESTEBAN, Ilocos Sur -Bayat ti panagkatangkatangna iti taaw ken isusuknor ti lammin ken bisinna, immapay iti panunotna a mabalin a daytoyen ti kanibusananna ket indatonna payen ti biagna iti Namarsua.

Segun ken ni Konsehal Marvin Ong, kameng ti sangguniang bayan ditoy, daytoy ti impalgak kenkuana ni Gil Malano, 51, residente iti Paratong Norte, Bangar, La Union iti panagpatpatangda itay Hulio 24.

Immasideg ni Malano ken ni Ong tapno maipatangatang iti DWRS ti pannakapukaw ti bilogna bareng mapasublina pay.

Iti panangisalaysay ni Malano ken ni Konsehal Ong, timmapog daytoy mangngalap iti baybay idi Hulio 22 ket nagipakat iti banniit iti kabaybayan a sakup ti Bangar, La Union.

Segun iti mangngalap, maysa a lames a pattapattaenna nga agdagsen iti nasurok walo a kilos ti dimmawi iti banniit ket idi guyodenna nga iyasideg iti bilog, naggulagol daytoy ket iti panagginnuyodda, isu metten ti nakatinnaganna iti bilog ken nakaiyanudan ti luganna a nagpataaw.

Tallupulo a minutos a nagkatangkatang ni Malano iti taaw agingga a nakakapet iti maysa a payaw. Ditoy ti naggiananna agingga iti simmangbay ti rabii.

Impagarupko a matayakon,” nakuna ni Malano ken ni Ong “Indatonko payen ti biagko iti Apo.”

Agarup alas siete ti rabii idi adda naripar ni Malano a nagtagisilaw a bilog. Nupay dina ammo no kasano kaadayo ti bilog, naglangoy ni Malano nga immasideg.

Taga-Bangar met laeng ti mangngalap. Isun ti nangitakdang ken ni Malano.

Nakadanon ni Malano ditoy gapu ta iti pattapattana, posible a naiyanud ti bilogna iti kabaybayan a sakup daytoy nga ili agingga kadagiti coastal barangays iti amianan a paset ti probinsia.

Maisubli koma ta daytoy ti dakkel a pagsapulak,” kinuna ni Malano.#