Mangngalap, ginandat a patayen ti padana a mangngalap

CAOAYAN, Ilocos Sur – Gapu iti pananggandatna a mangpatay iti kalugaranna, sumango iti dua a kaso ti maysa a mangngalap.

Indatagen ti polis ditoy iti opisina ti provincial prosecutor, Vigan City dagiti rekord mainaig iti attempted murder ken double frustrated homicide maikontra ken ni Roger Llanes y Ragunjan, 29, naasawaan, mangngalap ken residente iti Barangay Villamar ditoy nga ili.

Naireport idi agarup 4:45 ti malem ti Marso 28 a ginandat ni Llanes a patayen ni Reynaldo Ragudo y Quemado, 34, naasawaan, mangngalap, ken kalugaran ti suspek ken nakadunoran ti dua nga ubbing.

Naammuan iti panagimbestiga dagiti polis a sakbay ti insidente, aggiinom da Jordan Rafanan y Llanes, 18, baro, ken di nainaganan a kakaduana iti maysa a nipa hut ket inimbitaran ni Jordan ni Reynaldo a pinadayawan met ti naudi ngem saan nga imminum.

Kalpasan ti sumagmamano a minutos, naggawiden ti biktima ket idi adda iti dalanna, binato ti suspek iti tallo a botelia ngem dina napuntaan.

Kinumpronta ti biktima ti suspek ngem idi simrek daytoy iti balayna, naggawiden ti biktima.

Sakbay a makadanon ti biktima iti balayna, nagparang ti suspek iti tawa ti balayna sana pinaltogan ti biktima iti naminsan ngem dina napuntaan ket ti kongkreto a diding ti balay ni Ferlita Ragudo y Quemado, 54, ti napuntaan ket mapapati a nagbalandra dagiti shrapnel a puon ti nakasugatan ti bukot ken ulo da Marcellie Ragudo y Llanes, 7, Grade I, ken ni Mary Jane Amoroso y Quemado, 10, Grade IV.

Naitaray dagiti ubbing iti Vigan Polyclinic Hospital idinto a tiniliw dagiti nagresponde a polis ti suspek.

Mapapati a dati a susik ti motibo ti pammaltog.

Saan a narekobre naaramat a paltog a mapapati a maysa a Gauge 12 kas maibatay kadagiti pellets a nasarakan iti nakapasamakan ti pammaltog.#