Mangngalap, mapukpukaw

SAN VICENTE, Ilocos Sur- Di pay nasarakan ti maysa a mangngalap a nagpukaw iti kabaybayan iti Sitio Namnama, Barangay San Sebastian ditoy nga ili itay lawasna.

Iti baet ti search operation nga insayangkat dagiti kalugaranna ken dagiti polis, di pay nabirokan ti bangkay ni Narciso Alcayaga, 76, residente iti Barangay Cabuloan, Sta. Catalina, Ilocos Sur.

Segun iti report, nagsisina a timmapog iti baybay da Alcayaga, ti anakna a ni Ruben, 36, ken Dominador Rabena, 59, residente iti Barangay Tamurong, Sta. Catalina, Ilocos Sur ket naduktalan laengen dagiti dua a mapukpukaw ni Narciso isu a nagpatulongda kadagiti kalugaranda ken iti polis.#