Mangngalap, nabtakan iti bongbong, natay

MAGSINGAL, Ilocos SurĀ  – Iti baet ti kampania dagiti lokal a gobierno ditoy probinsia maikontra iti illegal a panagkalap adda latta dagiti agaramat iti bongbong iti baet a napeggad daytoy a wagas ti panagkalap.

Kas resulta, maysa a mangngalap ti naireport a nagudas idi malem ti Hunio 27 maigapu iti panagbettak ti bongbong iti imana.

Segun iti report manipud iti polis ditoy nga ili, natay ni Rufino Tiqui, 64, residente iti Barangay Puro, ditoy nga ili gapu kadagiti grabe a sugat a ginubbuay ti panagbettak ti bongbong nga iggemna sakbay a maipuruakna.

Napukolan ti biktima ken nagsagrap kadagiti grabe a sugat iti nadumaduma a paset ti bagi, ken rupana ket pimmusay iti balay-pagagasan a nakaitarayanna.#