Mangngalap, nagudas iti pammagsol

CABUGAO, Ilocos Sur – Malas ti petsa 13 iti daytoy a mangngalap ta nagudas iti daytoy nga aldaw.

Nasarakan ti bangkay ni Simeon Tagle y Tisbe, 56, naasawaan, mangngalap, ken residente iti Barangay Salomague, ditoy nga ili idi agarup alas 10:30 ti Disiembre 13, iti asideg ti coastal reef iti dayaen ti Salomague Port ditoy nga ili.

Segun iti report, sakbay ti insidente, napan nagkalap ti biktima ket aggawiden idi kinamat ti suspek a nainaganan Marvic Acedo y Robiego, 22, baro, ken residente iti Barangay Sabang, Cabugao met laeng, sana binagbagkong ti biktima iti nadumaduma a paset ti bagi daytoy.

Saan a narekobre dagiti polis ti naaramat iti pammagsol ken agdama a birbirokenda ti suspek.

Dati a susik ti mapapati a motibo ti pammagsol.#