Police Report: Mangngalap, napaltogan | Tawid News Magazine - Weekly Ilocos News 📰

Mangngalap, napaltogan

Police crime scene

CAOAYAN, Ilocos Sur — Maysa a mangngalap ti pinaltogan dagiti nakamotorsiklo a lallaki idi 8:30 ti bigat, Oktobre 30, 2019 sadiay Brgy. Callaguip, Caoayan, Ilocos Sur.

Nainaganan ti biktima a ni Pedro Funtanilla y Rugero, 60, naasawaan, mangngalap, ken residente ti Brgy. Pandan, Caoayan, Ilocos Sur.

Iti report dagiti polis, agdaldaliasat nga agpaamianan ti biktima a nakasakay iti tricycle-na idi bigla a pinaltogan manipud iti likod dagiti saan pay a nabigbig a lallaki a nakamotorsiklo.

Naitaray ti biktima sadiay Ilocos Sur Provincial Hospital – Gabriela Silang iti siudad ti Vigan ngem naideklarar daytoy a DOA. Mapapati nga impatay ti biktima ti tama ti bala iti makinkannigid ti ulona.

Segun iti report ti media, mapan koma balonan ti biktima dagiti annakna a madama a nakabalud iti custodial facility ti Caoayan PNP gapu iti kaso a pammagkong a napasamak sadiay Fuerte, iti daytoy a munisipio.

Madama pay laeng ti inbestigasion dagiti kameng ti PNP iti insidente.