Mangngalap, nasarakan tumtumpaw iti karayan

CAOAYAN, Ilocos Sur – Nasarakan ti maysa a mangngalap a tumtumpaw iti karayan a sakup ti Barangay Tamurong, ditoy nga ili idi agsapa ti Disiembre 5.

Intaray dagiti nagresponde a polis ni Emidio Bermio y Arce, 76, naasawaan, mangngalap, ken residente iti nadakamat a barangay, iti Gabriela Silang General Hospital sa inyalis dagiti kabagianna iti Vigan Polyclinic Hospital a nakaideklaraanna nga awanen ti biagna idi agarup 8:30 ti bigat iti dayta met la a petsa.

Segun ti report, napan nagkalap babaen iti iket ni Bermio iti nasao a karayan.

Idi agarup 6:50 ti bigat, nakita laengen ni Richard Menor ti biktima a tumtumpaw iti abay ti rakitna ket intakdangna daytoy sana inreport ti insidente iti polis.

Saan a nadakamat ti report no kasano a nalmes ni Bermio.#